08/10/2026
የአርቴፊሻል ኢንተለጀንስ ፉክክር ለአለም አቀፍ ደህንነት እና ለሰዎች መብት ከባድ ስጋት መሆኑን የተመድ ሰባአዊ መብቶች ከፍተኛ ኮሚሽነር አስታወቁ
*****
የተባበሩት መንግስታት ድርጅት የሰባአዊ መብቶች ከፍተኛ ኮሚሽነር ቮልከር ቱርክ በሰጡት ሀሳብ፣ በዓለም አቀፍ ደረጃ በሀገራት እና በታላላቅ የቴክኖሎጂ ኩባንያዎች መካከል እየታየ ያለው የአርቴፊሻል ኢንተለጀንስ (AI) ፉክክር ከቁጥጥር ውጭ እየወጣ መሆኑን አስጠንቅቀዋል።
ኮሚሽነሩ አያይዘውም ይህ አካሄድ ለሰው ልጆች መሰረታዊ መብቶች፣ለዲሞክራሲያዊ ስርዓት እንዲሁም ለአለም አቀፍ ደህንነት ከባድ ስጋት እየደቀነ መሆኑን ጠቁመዋል።
በዓለም አቀፍ የቴክኖሎጂ ገበያ ጥናቶች እንደተመለከተው፣ በጄኔሬቲቭ ኤአይ (Generative AI) ቴክኖሎጂዎች ላይ የሚደረገው ዓመታዊ የገበያ ዝውውርና ኢንቨስትመንት ከ200 ቢሊዮን የአሜሪካ ዶላር በላይ ደርሷል።
ዘ ጋርዲያን እና የዩኤን ዜና ማዕከል እንደዘገቡት፣ የቴክኖሎጂው ዘርፍ ያለ ማንም ከልካይ እና አስገዳጅ ህጎች በፍጥነት ማደጉ፣በተለይም የሐሰተኛ መረጃዎችን ስርጭት፣ የዜጎችን ግላዊነት መብት መጣስ እና የስራ አጥነት ቀውሶችን እንደሚያባብሰው ተመላክቷል።
በዓለም ዙሪያ ያሉ መንግስታት አሁን ባለው ፍጥነት የሚንቀሳቀሱ ከሆነ፣ አርቴፊሻል ኢንተለጀንስ ማህበራዊ አለመረጋጋትን የመፍጠር እድሉ ሰፊ መሆኑን ተመራማሪዎች ስጋታቸውን ገልጸዋል።
ከተባበሩት መንግስታት የሰባአዊ መብቶች ጽህፈት ቤት መረጃዎች እንደሚያመለክቱት፣ ከ 70% በላይ የሚሆኑ የዓለም ሀገራት አሁንም ለአርቴፊሻል ኢንተለጀንስ ፈጣን ዕድገት እና አደገኛ ድርጊቶች ምላሽ የሚሰጥ ሕጋዊ እና አስገዳጅ የቁጥጥር ማዕቀፍ የላቸውም።
በመሆኑም ተመድ ዓለም አቀፍ ማህበረሰቡ በአስቸኳይ ጥብቅ የቁጥጥር ማዕቀፎች እና የስነ-ምግባር መርሆዎች ላይ እንዲስማማ ጥሪ አቅርቧል።
የቴክኖሎጂ ኩባንያዎች ምርቶቻቸውን ለገበያ ከማቅረባቸው በፊት ጥልቅ የደህንነት እና የማህበራዊ ተጽዕኖ ግምገማዎችን እንዲያደርጉ የሚያስገድድ ዓለም አቀፍ ህግ መዘጋጀት እንዳለበት ቮልከር ቱርክ አሳስበዋል።
ዘ ጋርዲያን አክሎ እንደዘገበው፣ ይህ የተመድ ማስጠንቀቂያ በዓለም ዙሪያ ያሉ የፖለቲካ መሪዎችን እና የኢንዱስትሪ ባለቤቶችን እያከራከረ ይገኛል።አንዳንድ ጥብቅ ህጎች የቴክኖሎጂውን ፈጠራ ሊያዘገዩት ይችላሉ የሚል ስጋት ሲያነሱ፣ አብዛኛዎቹ ባለሙያዎች ግን የሰው ልጆችን ደህንነት ለማስቀደም አስቸኳይ የቁጥጥር ስርዓት መዘርጋት አማራጭ የሌለው ጉዳይ መሆኑን አበክረው እየገለጹ ይገኛሉ።