Birhan Training Institute

20/08/2026

AI ሥራዎቻችንን ሊነጥቅ ነው ወይስ ሊያግዝ ነው?
```````````````````````````````````````````````````````
How to be human in the age of AI?

የሰው ሰራሽ አስተዋይነት (AI) በፈጣን ሁኔታ ማደግ በዓለም ዐቀፍ የሥራ ገበያ ላይ ከፍተኛ ለውጥ እና ስጋት ደቅኗል። እንደ ጎልድማን ሳክስ (Goldman Sachs, 2023) ጥናት ከሆነ፣ AI እስከ 300 ሚሊዮን የሚደርሱ የሙሉ ጊዜ ሥራዎችን በአውቶሜሽን(Automation) የመተካት ወይም የማስተካከል ዐቅም አለው። በተለይም ድግግሞሽ የሚበዛባቸው ሥራዎች፣ መረጃን ማቀናበር እና ደንብ ተኮር የሆኑ ሙያዎች ለዚህ ስጋት የበለጠ ተጋላጭ ናቸው። ከእነዚህም መካከል መረጃ አስገቢዎች (Data Entry Clerks) እና የሒሳብ መዝገብያ ያዦች (Bookkeepers) መረጃን የማደራጀትና የማስላት ሥራዎች በሶፍትዌሮች በመተካቱ ቀዳሚዎቹ ተጎጂዎች ሆነዋል። በተጨማሪም ዘመናዊ AI ቻትቦቶች(Chabot) እና የቋንቋ ሞዴሎች (LLMs) ማደጋቸው የደንበኞች አገልግሎት ተወካዮችን (Customer Service Reps)፣ የይዘት ጸሐፊዎችን እና አስተርጓሚዎችን ሥራ በከፍተኛ ደረጃ እየተተካ ይገኛል። ማይክሮሶፍት እና አንትሮፒክ (Microsoft Research; Anthropic Research, 2026) ባደረጉት የቅርብ ጊዜ ጥናቶች መሠረት፣ የጀማሪ ደረጃ የሶፍትዌር አልሚዎች (Junior Developers) እንኳን ሳይቀሩ መሠረታዊ ኮዶችን በ AI ረዳቶች በፍጥነት መጻፍ በመቻሉ የሥራ ዕድላቸው እየጠበበ መጥቷል።

ይሁን እንጂ የአለም ኤኮኖሚ ፎረም (World Economic Forum, 2025) እና ዐቀፍ የሠራተኞች ድርጅት (ILO, 2025) ሪፖርቶች እንደሚያመለክቱት፣ AI ሥራዎችን ሙሉ በሙሉ ከመደምሰስ ይልቅ የሰዎችን የእለት ተእለት ተግባር የማቃለል እና አዳዲስ ሙያዎችን የመፍጠር ሚናው የጎላ ነው። ከፍተኛ ስሜታዊ ብልህነት፣ ፈጠራ እና አካላዊ እቅስቃሴ የሚጠይቁ ሥራዎች አሁንም ቢሆን በ AI ለመተካት አዳጋች ናቸው። ስለዚህ ሰራተኞች ከ AI ጋር አብሮ ለመሥራት የሚያስችሏቸውን አዳዲስ የቴክኖሎጂ ክህሎቶች በማዳበር ከለውጡ ጋር መራመድ ይኖርባቸዋል። አለበለዚያ በአጭር ጊዜ ውስጥ ለ AI ቦታ ለመልቀቅ ይገደዳሉ!

19/08/2026

ሜታ ኩፓንያ (Meta) ከ1 ትሪሊዮን ዶላር በላይ የሚገመት የካሳ ክስ ቀረበበት!

የፌስቡክ፣ ኢንስታግራም እና ዋትስአፕ እናት ኩባንያ የሆነው ሜታ (Meta) በቴክኖሎጂው ታሪክ ታይቶ የማይታወቅ ከፍተኛ ክስ ቀረበበት። ከ29 በላይ የሚሆኑ የአሜሪካ ግዛቶች በጋራ በመሆን በሜታ ላይ ባቀረቡት በዚህ ክስ፣ ኩባንያው እስከ 1.4 ትሪሊዮን ዶላር የሚደርስ ቅጣት እንዲከፍልና ማኅበራዊ ሚዲያዎቹ በሚሠሩበት መንገድ ላይ መሠረታዊ ለውጥ እንዲያደርግ ጠይቀዋል። ይህም ቅጣት የኩባንያውን አጠቃላይ የገበያ ዋጋ የሚፈታተን ከፍተኛ የገንዘብ መጠን መሆኑ እየተዘገበ ይገኛል።
የክሱ ዋና መንስኤ ሜታ ወጣቶችንና ሕፃናትን ሆን ብሎ ለሶሻል ሚዲያ ሱስ በሚዳርጉ የፕላትፎርም ዲዛይኖች (Algorithms) ማጥመዱ ነው። እንደ ማለቂያ የሌለው ይዘት ማሳያ (infinite scrolling) እና አስገዳጅ ማሳወቂያዎች (push notifications) ያሉ ባህሪያትን በመጠቀም ወጣቶች በስልካቸው ስክሪን ላይ የሚያሳልፉትን ጊዜ እንዲያረዝሙ ማድረጉ ተጠቅሷል። በተጨማሪም ኩባንያው ከ13 ዓመት በታች የሆኑ ህፃናትን የግል መረጃ ያለወላጆቻቸው ፈቃድ በመሰብሰብ የአሜሪካን የሕፃናት የግል መረጃ ጥበቃ ሕግ (COPPA) ጥሷል በሚል ተከሰሷል።
ይህ ክስ በዲጂታል ዓለም ውስጥ በትልልቅ የቴክኖሎጂ ኩባንያዎች ላይ የተከፈተ ትልቅ ዘመቻ ሲሆን፣ የማሕበራዊ ሚዲያ መድረኮች ለተጠቃሚዎቻቸው የአእምሮ ጤና እና ደህንነት ተጠያቂ መሆን እንዳለባቸው የሚያሳይ ማንቂያ ደወል እንደሆነ ይነገራል።

በኛ አገር የሕጻናት የማኅበራዊ ሚዲያ አጠቃቀም ሁኔታ ምን ይመስላል?

07/05/2026

Leadership dilemma
``````````````````````````````````
The best way to predict the future is to create it.
Abraham Lincoln

ሁልጊዜ መሪዎች በሁለት አስቸጋሪ ምርጫዎች መካከል ሚዛን ለመጠበቅ ይገደዳሉ። አንደኛ በሌላኛው የዓለም ጥግ የሚከናወኑ፣ ነገር ግን ውጤታቸው ዓለም ዐቀፋዊ አስከትሉት ያላቸዉ ጒዳዮች ሲሆኑ ሁለተኛው ወደ ፊት ሊከሰቱ ስለሚችሉ ጉዳዮች ወይም በአጭሩ የነገ ጒዳይ ነው። እጃችን ላይ በደርዜን የሚቈጠሩ አንገብጋቢ ችግሮች እያሉ የሩቁን ማሰብ ለምን አስፈለገ? የሚል ጥያቄ ነው። ወይም ዛሬ እጅግ አጣዳፊና ፋታ የሚነሡ ብዙ ችግሮች በዙሪያችን ሞልተው እያለ ስለማንኖርበት ነገ መጨነቊ የጤና ነው? ብሎ አንድ ሰው ሊጠይቅ ይችላል። እነዚህ ሁለት ጥያቄዎች የሚነሡት አንድም ዓለም ዐቀፋዊ ችግሮች ላይ ውይይት ሲደረግ አሊያም ወደ ፊት ሊከሰቱ ስለሚችሉ ችግሮች ላይ ትኲረት ሲደረግ ነው። ዓለም ዐቀፋዊም ሆነ የነገ ጒዳዮች ላይ እንደዚህ ዓይነት ጥያቄዎች መነሣታቸው ብዙ አይገርምም። ይኸ አስተሳሰብ አብዛኛው ሕዝብ የሚጋራው ነው። በርግጥም ለብዙ ዘመናት የነበሩ የሰው ልጆች ጥናት በአመዛኙ ትናንትናና ዛሬ ላይ ያተኮረ ነበር። የምናውቀው ስለ ወደፊት ወይም ነገ ብዙ ትኲረት ሲሰጥ አይስተዋልም።

ከቅርብ ጊዜ ወዲህ ግን ‘የነገ’ ጥናት ወይም “Future Study” (Futurology) በጣም ታዋቂ እየሆነ መቷል። ከዚህ በተጨማሪ ዓለም ሉላዊ ከመሆኗ የተነሣ ችግሮችን ለመፍታት በተናጥል የሚደረግ ሙከራ ቀርቶ በጋራ መወያየት ላይ ትኲረት ማድረግ የተሻለ አማራጭ እየሆነ ይገኛል። ከነዚህ ሙከራዎች መካከል አንዱ የሮም ክለብ (Club of Rome) የተሰኘ ቡድን በ1972 ዓ.ም ያሳተመው ሪፖርት ነው። በሪፖርቱ ላይ የሰው ልጆች ለሚኖሩበት ዓለም ያላቸው አስተሳሰብ ቀጥሎ ባለው ግራፍ አስቀምጠዋል።

(see the attached graph):-

ግራፉ በጊዜና (Time and Space) በቦታ የተዋቀረ ነው። ቊሙ መስመር (y co-ordinate) ቦታ (Space) የሚያመልክት ሲሆን አግዳሚው መስመር (x co-ordinate) ጊዜን (Time) ያመለክታል። ነጥብጣቦቹ ሰዎች ሲሆኑ በምን ጒዳዮች ላይ ትኲረት እንደሚያደርጒ ያሳያል። ብዙ ነጥብጣቦች ብዙ ሰው የሚያመለክቱ ሲሆን ዘርዘር ያሉ ነጥቦች ጥቂት ሰዎችን ያሳያሉ። ከግራፉ እንደምንረዳው አብዛኛው ሰው የቅርብ ጊዜ ችግሮችንና በአብዛኛው በራሱ ቤተሰብ ዙሪያ ብቻ የሚያውጠነጥን ነው። አብዛኛው ሰው ከጊዜ ዕለታዊ ችግሮች ላይ ብቻ ትኲረት የሚያደርግ ሲሆን ከቦታ አንጻር የራሱ ወይም የራሱ ቤተሰብ ጋር የተያያዙ ጒዳዮች ላይ ብቻ ትኲረት ያደርጋል። ጧት ከእንቅልፉ ተነሥቶ ወደ ዕለት ተግባሩ የሚሰማራው የዕለት ጒርሱን ለማሸንፍ ሊሆን ይችላል። በሌላ ጎን ደግሞ የሚሠራው የአጭር ጊዜ (ምናልባት የዛሬ ወይም የሳምንት) ጉርሻው እንዳይጎድልበት ሊሆን ይችላል። በጣም አሰበ ከተባለ የወሩ ወይም የዓመቱ የኑሮ ዋስትና ለማረጋገጥ ሊሆን ይችላል። ከራሱ ሕይወት አልፎ የሌሎችን ሰዎች ሕይወት በአዎንታዊ መልክ ለመለወጥ የሚያስብ ሰው በጣም ጥቂት ነው። እንዲሁም ከዛሬ አሻግሮ በመመልከት የትውልድ ጉዳይ የሚያሳስበው ሰው ብዙ አይደለም። በአጭር አገላለጽ ከራስና ከራስ ዘመድ አልፎ ለሌሎች የሰው ልጆች ማሰብ እንዲሁም ነገ የሚመጣውን ትውልድ እያሰበ የሚሠራ ሰው በጣም ጥቂት ነው።

እሩቅ የሚያስቡና የብዙ ሰዎች ሕይወት ለማሻሻል የሚጥሩ ሰዎች ቊጥራቸው እጅግ በጣም ጥቂት ነው። ከዛሬ ችግሮች በላይ አሻቅቦ ነገ ሊከሰት ስላለው ችግር ከወዲሁ ዝግጅት እንዲደረግ የሚያሳስብ ሰው ብዙ አይደለም። ከዚህ የተነሣ አንዳንድ ችግሮች በግልጽ ፈጥጠው እየታዩ እንኳን፣ አብዛኛው ሰው በቀጥታ እራሱን ወይም ቤተሰቡን የማይነካ ስለሚመስለው ግድ አይሰጠውም።

ብዙውን ጊዜ ወቅታዊ ችግሮች ላይ ብቻ አተኩሮ ነገ ሊከሰቱ የሚችሉ ችግሮችን ለመገመት አለመሞከር ችግሮቹ ድንገተኛ አደጋ ሆነው ከተፍ ብለው እንዲከሰቱ ምክንያት ይሆናል። ይኸ አካሄድ አጸፋዊ (Reactive) ምላሶችን ብቻ እንድንሰጥ ያስገድደናል። ችግሮች ይፈጠራሉ፣ ከዚያ በኋላ ለመፍትሔ እንሯሯጣለን። አንዳንድ ችግሮች ደግሞ ችግር ሆነው ሲታዩ ብዙ ብልሽት ካደረሱ በኋላ ስለሆነ መፍትሔያቸው ብዙ ዋጋ ያስከፍላል፣ መፍትሔው ተገኝቶ ከሆነ።

ተቋማትንም እንደ ሰዎች/ግለሰቦች መውሰድ እንችላለን። ሁልጊዜ በወቅታዊና ደራሽ ሥራዎች ላይ ብቻ ትኲረት የሚያደርግና ስልታዊ ዕቅዶች ላይ ትኲረት የማያደርግ ተቋም በዛሬው ዓለም በሕይወት መቀጠል አይችልም። በዚህ ዘመን ጠንካራና ዘመን ተሻጋሪ ተቋማትን ለመመሥረት ከሚያስፈልጒ ዋና ዋና ጉዳዮች መካከል ዓለም ዐቀፋዊ አውድን በተከተለ መልኲ እራሱን ሲያደራጅና ነገን በመገመት የተለያዩ የዕቅድ አማራጮችን ሲይዝ ነው። ይኸ አካሄደ ተለማጭነት (Adaptability) ይሰኛል። በ21ኛው ክፍለ ዘመን እጅግ አስፈላጊ ከሆኑ የመርነት ክህሎቶች መካከል አንዱ ነው። ዓለም ተለዋዋጭ በመሆኗ በአንድ ስልታዊ ዕቅድና እሳቤ ላይ ብቻ ተቸንክሮ መቆየት ዋጋ ያስከፍላል። ይልቊን ብዙ የይሆናል አማራጮችን ይዞ ሁሌ ለለውጥ መዘጋጀት የተሻለ አማራጭ ሆኖ ተገኝቷል። በአጋጣሚ የመጀመርያ አማራጭ ሳይሳካ ሲቀር ሁለተኛ አማራጭ ይወሰዳል። ይከሰታሉ ተብለው የሚገመቱ ችግሮች ቀድሞ (Scenario) ዝግጅት ስለሚደረግ አስከትሎቶቻቸው (impacts) ይቀንሳል።
ስለ ነገ ማሰብም ሆነ ዓለም ዐቀፋው አውድን ባማከለ መልኲ ችግሮችን መተንተን ማለት ወቅታዊ ችግሮችንና አካባቢያዊ ችግሮችን መዘንጋት ማለት አይደለም። ጊዜ የማይሰጡ አንገብጋቢ ችግሮችን እየፈቱ በዚያ ልክ ለችግሮቹ ዘላቂ መፍትሔ እያበጁ መሄድ የተሻለ አማራጭ ነው። አለበለዚያ በተመሳሳይ ችግሮች ላይ ዘመናትን የመፍጀት አዙሪት ውስጥ ይከታል። አንዳንድ ችግሮች በተፈጥሮአቸው ዓለም ዐቀፋዊ አውድን በመረዳት የሚፈቱ ናቸው።

ስለዚህ በዚህ ዘመን ያለ ማንኛውም ሰው፣ በተለይ በመርነት ደረጃ ያለ ሰው ዓለም ዐቀፋዊ አውድን የተገነዘበ፣ ዘላቂ መፍትሔ ማበጀት የሚችል ሰው መሆን ይኖርበታል። ጎበዝ የሆነ መር ከጠቅላላው ሕዝብ በተሻለ ሁኔታ ነገን አሻግሮ ማየት የሚችልና ከራሱ የግል ጥቅም አልፎ ለሰው ልጆች የጋራ ደህንነትና ሰላም መሥራት የሚችል ነው።

22/03/2026

ሁለንተናዊ ደህንነት

መግቢያ

ደህና ነህ? ወይም ደህና ነሽ? ደህና ናችሁ? መባባል በኛ አገር ባህል የተለመደ የሰላምታ መለዋወጫ መንገድ ነው። ምላሹ ደግሞ ተጠያቂው/ሰላምታ የቀረበለት ሰው ደህና መሆኑን ከተናገረ በኋላ ለዚህ ደህንነት ፈጣሪን የሚያመሰግን ቃል ያስከትላል። እንግልዝኛ ተናጋሪዎች በበኩላቸው ጧት፣ ከሰዓት እና ምሽት ላይ Good የሚለውን ቃል በመጨመር ሰላምታቸውን ይለዋወጣሉ። ግን ደህንነት ምንድን ነው? አንድ ሰው ደህና ነው የሚባለው መቼ ነው? ለመሆኑ ሙሉ ደህንነት አለ? ከፍል ደህንነትስ? በተለምዶ አንድ ሰው በአካል ካልታመመና አልጋ ላይ ካልተኛ በስተቀር ደህና እንደሆነ ይታሰባል። ይህ እሳቤ ደህነንትን በአካላዊ ብቻ ከማድረግ ጋር የተያያዘ ነው። ነገር ግን ሙሉ ደህንነት ሰፊ ጒዳዮችን ያካትታል። ሙሉውን ዝርዝር ከማየታችን በፊት ደህነት ራሱ ምን እንደሆነ መተርጐም ይኖርብናል።
የደህንነት ትርጒሞች
ዓለም ዐቀፉ የደህንነት ተቋም (The Global Wellness Institute) ደህንነትን እንደሚከተለው ይተረጒማል።

ወደ ሙሉ ደህንነት የሚመራ ንቊ እንቅስቃሴዎችን፣ ምርጫዎችንና የሕይወት ዘይቤን የሚያካትት የፈለጋ ውጤት ነው ።

በዚህ ትርጒም ውስጥ የምናገኘው ዋና ሐሳብ ደህንነት ሰው ቊጭ ብሎ የሚጠብቀው ሳይሆን በብርቱ ፈለጋ (Pursuit), በምርጫና በተግባር የተደገፉ እርምጃዎችን በመውሰድ የሚመጣ ነገር ነው። በዚህ እሳቤ ደህንነት አንድ ነገር ላይ ብቻ የሚያተኲር ሳይሆን ሁለንተናዊ ማንነትን (holistic) የሚያካትት ነገር ነው።
ደህንነት የሕመም አለመኖር ሳይሆን ንቊ የሆነ የደህንነት አስተሳሰብ፣ የሕይወት ዘይቤና ያንን ያማከለ ተግባራዊ ድርጊቶችን የተከተለ የሕይወት ዘመን ትምህርት ነው።
የዓለም ጤና ድርጅት ደህንነት (Health) ሙሉ የሆነ አካላዊ፣ አእምሮአዊ እና ማኅበራዊ ብልጽግና (Wellbeing) ላይ መገኘት እንደሆነ ያስረዳል። ስናጠቃልለው ደህንነት ማለት፥-
 ንቊ (Conscience) የሆነ፣ በራስ ተነሳሺነት የሚተገበር የሕይወት ዘመን ጒዞ ነው
 በአንድ ሰሞን ተሞክሮ የሚተው ሳይሆን የሕይወት ዘይቤ (Life Style) ነው።
 ደህንነት በባህሪው አዎንታዊ የሆነ፣ አንድ ሰው እምቅ ዐቅሙን እንዲጠቀም የሚያስችል ረጅም ዕድሜን ከጤና ጋር የሚያጎናጽፍ ሥራ ነው።
 ደህንነት ሁሉን ዐቀፍና ሁሉን የሕይወት ክፍል የሚያጠቃልል ነገር ነው።

ስለ ትርጒም ይኸን ያህል ካልን አሁን ሙሉ ደህንነት የሚያካትታቸው የሕይወት ክፍሎችን ወደ መዘርዘር እንሄዳለን።
1. አካላዊ ደህንነት 5. ማኅበራዊ ደህንነት
2. ስሜታዊ ደህንነት 6. አካባቢያዊ ደህንነት
3. አእምሮአዊ ደህንነት 7. የኢኮኖሚ ደህንነት
4. መንፈሳዊ ደህንነት 8. የሥራ ቦታ ደህንነት

30/01/2026

አዲሱ ዲጂታል መታወቂያ (ፋይዳ) 666 ነውን?

ጥያቄ፡ ፋይዳ ከ 666 ጋር ይያያዛል?

ምንም እንኳን ፋይዳ ዓላማው የግለሰብ መለያ ሥርዐት ቢሆንም፣ መታወቂያውን በፍራቻ የሚመለከቱ ሰዎችም አልታጡም፡፡ የፍራቻቸው ምንጭም ዲጂታል መታወቂያው የአውሬው ቁጥር ሊሆን ይችላል ከሚል ጥርጣሬ የመነጨ ነው፡፡ “ይመጣል የተባለው የአውሬው ምልክት (666) እሱ ነው” ብለው የሚሞግቱ ሰዎች እዚህም እዚያም አሉ፡፡ ግና የአውሬው ቁጥር ማለት ምን ማለት ነው? ፋይዳ የአውሬው ቊጥር ብሎ ለመፈረጅ ቅድሚያ የአውሬው ቊጥር ምን እንደሆነ መረዳት ተገቢ ነው።

አውሬውና ቁጥሩ (666)

ስለ 666 ለኢትዮጵያውን መንገር ለቀባሪ ማርዳት ያህል ነው፡፡ ስለዚህ ጉዳይ ብዙ ተብለናል፣ በየቦታው የሚወጡ ሰይጣኖችም ስለ ቊጥሩ ብዙ አስተምረውናል፡፡ 666 እየመጣባችሁ ነው ተጠንቀቁ ተብለናል፣ ከቁጥሩ ጋር ተያይዞ የሚነሡ ምልክቶች በልብሳችን ላይ ድንገት ሲገኝ የእሳት ሲሳይ አድርገናል…. ብዙ ብዙ። የአውሬው ቊጥር ተብሎ በመጽሐፍ ቅዱስ የተጠቀሰው በዮሐንስ ራዕይ መጽሐፍ ነው።
አእምሮ ያለው የአውሬውን ቍጥር ይቍጠረው፤ ቍጥሩ የሰው ቍጥር ነውና፥ ቍጥሩም ስድስት መቶ ስድሳ ስድስት ነው። ራዕይ. 13፡18
በዚህ ጥቅስ ላይ ሁለት ዋና ዋና ነገሮችን መገንዘብ አስፈላጊ ነው፡፡ አውሬና ቁጥሩ፡፡ ለመሆኑ አውሬው ማን ነው? ቁጥሩስ?

አውሬው ማን ነው?

ይህንን ለመረዳት የዮሐንስ ራዕይ ምዕራፍ 13 ሙሉውን መረዳት ተገቢ ይመስለኛል፡፡ በዚህ በተጠቀሰው ምዕራፍ ዮሐንስ አንድ ልዩ አውሬ ከባህር ሲወጣ ይመለከታል፡፡ ያየው አውሬ እንዲህ ብሎ ይገልጸዋል፡፡
አንድም አውሬ ከባሕር ሲወጣ አየሁ፤ አሥር ቀንዶችና ሰባት ራሶች ነበሩት፥ በቀንዶቹም ላይ አሥር ዘውዶች በራሶቹም ላይ የስድብ ስም ነበረ። ራዕ. 13፡1
ከአውሬው ጋር የተያያዙ ሌሎች ጉዳዮች፦
• አሥር ቀንዶችና ሰባት ራሶች (የቀንድና የራስ ብዛት አለመመጣጠን አለ)
• ለሞት ሊያበቃ የሚችል ቊስል፣ ግን ወዲያው በመፈወሱ ምክንያት ዓለም ሁሉ መደነቊን
• ከመደነቃቸው የተነሣ የሚሰግዱለት
• እግዚአብሔርን መሳደቡን
• ከቅዱሳን ጋር በቀጥታ የሚዋጋ፣ ሥልጣንም የተሰጠው።
• ቀድሞ የተገለጠውን አውሬ የሚያግዝ ሌላኛው አውሬ መገለጡ፣
• ታላላቅ ምልክቶችን ያደርጋል
• የአውሬው ስም ወይም ቊጥር ለሁሉም ሰዎች የሚሰጥ መሆኑ
• ቊጥሩ ወይም ምልክቱ በቀኝ እጅ ወይም በግንባር ላይ የሚለጠፍ ነው።

ጥያቄዎች
1. ለመሆኑ ዛሬ እንደዚህ ዓይነት ክስተቶች በዓለም አሉ?
2. ለመሆኑ ይኸ ቊጥር እንደሚባለው 666 ነው ወይስ ሌላ?
3. 666 በርግጥ ቊጥር ነው ወይስ ለውክልና የገባ ሌላ ሐሳብ?
4. እንደዚህ ዓይነት የዓለም ሥርዐት ከመታወቂያ ጋር እንዴት ሊገናኝ ይችላል?
የአውሬው ቊጥር የተባለው 666 ነው፣ ይኸ ቊጥር በሥነ መለኮት ተማሪዎች ዘንድ ከፍተኛ ውዝግብ ያስከተለ ቊጥር ነው። ይኸ ከራዕይ መጽሐፍ ባህሪይ የሚመጣ ነው። የራዕይ መጽሐፍ በብዛት ምልክቶችን ስለሚጠቀም፣ ምልክቶች ደግሞ የሚወክሉት ሌላ ሐሳብ ስላላቸው ነው። ለምሳሌ ከላይ እንዳየነው አውሬ መንግሥትን ወይም መንግሥትን የሚመራ ክፉ ሰውን ይወክላል።
ስለ 666 ምሁራን ምን ይላሉ፦
• ቀደምት ቅጂዎች 666 በሚለው ፈንታ 616ን ተጠቅመዋል።
• 666 በመጀመሪያው ክፍለ ዘመን ክርስቲያኖችን ካሰቃየው የሮም ንጉሥ ቄሳር ኒሮ ጋር ያያይዙታል፣ ቄሳር ኒሮ ስሙ ተደምሮ 666ን ያስገኛል።
• 666 የሰው ቊርጥ፣ ፍጹም ያልሆነ ነገር ለማመልከት፣ በተቃራኒው 7 (777) ፍጹም የሆነ ነገር፣ አዲስ የተፈጠረው በ6ኛው ቀን ነው፣ እግዚአብሔር ከሥራው ያረፈው በ7ኛው ቀን ነው።
• የመላእክት ቊጥር (Luck Number)

666 አሁን በኢትዮጵያ እየተተገበረ ካለው የመታወቂያ ሥርዐት ጋር የሚያገናኝ አንዳችም ነገር ስለሌለ አላስፈላጊ ፍርሃቶችን ማስወገድ ያስፈልጋል።