08/11/2026
මහත්වරුනී,
බහුතරයක් MIG වෙල්ඩින් කියලා කරන්නේ ඇත්තටම MAG වෙල්ඩින් බව ඔබ දන්නවාද?
ඉතින් අපේ රටේ වෙල්ඩින් ක්ෂේත්‍රයේ බොහෝ දෙනෙක් කම්බියක් ස්වයංක්‍රීයව පෝෂණය වන, ආවරණ වායුවක් භාවිතා කරන වෙල්ඩින් මැෂින් සියල්ලටම සාමාන්‍යයෙන් MIG මැෂින් කියන නම භාවිතා කරනවා.
නමුත් තාක්ෂණිකව MIG සහ MAG කියන්නේ එකම මූලික ක්‍රියාවලියට අයත්, ආවරණ වායුවේ ස්වභාවය අනුව වෙන් කරන ක්‍රම දෙකක් බව මෙම ලිපියෙන් ඔබට අවබෝධ වනු ඇත
අද අපි මේ දෙක අතර වෙනස, භාවිතා කරන ආවරණ වායු වර්ග සහ ඒවා භාවිතා කරන හේතු ගැන පැහැදිලිව කතා කරමු.
මොකද්ද මේ MIG වෙල්ඩින් කියන්නේ
MIG කියන නමේ සම්පූර්ණ තේරුම Metal Inert Gas.
සිංහලෙන් කිව්වොත් නිෂ්ක්‍රිය ආවරණ වායුවක් භාවිතා කරමින් සිදුකරන ලෝහ ආර්ක් වෙල්ඩින් ක්‍රමයයි.
මෙහිදී අඛණ්ඩව පෝෂණය වන පිරවුම් කම්බියක් Wire Electrode සහ වැඩ කොටස අතර විද්‍යුත් චාපයක් ඇති කරනවා. එම චාපයේ තාපයෙන් කම්බිය සහ මූලික ලෝහය උණු වී වෙල්ඩින් සන්ධිය නිර්මාණය වෙනවා.
මෙහිදී ආර්ක් එක සහ උණු වූ ලෝහ තටාකය වායුගෝලයේ ඔක්සිජන් සහ නයිට්‍රජන් වැනි දේවලින් ආරක්ෂා කිරීමට නිෂ්ක්‍රිය ආවරණ වායුවක් භාවිතා කරනවා.
ප්‍රධාන වශයෙන් භාවිතා කරන වායුන් වර්ග දෙකක් ලෙස
පිරිසිදු Argon ආගන්
Argon සහ Helium මිශ්‍රණ.
මෙම වායු සාමාන්‍ය වෙල්ඩින් තත්ත්වයන් යටතේ උණු වූ ලෝහය සමඟ රසායනිකව ප්‍රතික්‍රියා නොකරන නිසා ලෝහයේ රසායනික සංයුතියට අනවශ්‍ය බලපෑම් අවම කරගැනීමට උපකාරී වෙනවා.
MIG වෙල්ඩින් බහුලව භාවිතා කරන අවස්ථා මොනවද කියලත් බලමු.
1. ඇලුමිනියම් සහ එහි මිශ්‍ර ලෝහ වෙල්ඩින් කිරීමට
2. මැග්නීසියම් සහ එහි මිශ්‍ර ලෝහ වෙල්ඩින් කිරීමට
3. තඹ සහ එහි ඇතැම් මිශ්‍ර ලෝහ වෙල්ඩින් කිරීමට
4. නිකල් සහ එහි මිශ්‍ර ලෝහ වෙල්ඩින් කිරීමට
5. ටයිටේනියම් වැනි විශේෂිත ලෝහ සඳහා සුදුසු විශේෂ ක්‍රියාපටිපාටි යටතේ වෙල්ඩින් කිරීමට
මෙවැනි ලෝහ සඳහා නිෂ්ක්‍රිය ආවරණ වායු භාවිතා කිරීමෙන් වෙල්ඩින් ක්‍රියාවලියේදී ලෝහයේ රසායනික සංයුතියට සිදුවිය හැකි අනවශ්‍ය බලපෑම් අවම කරගන්න පුළුවන් බවත් ඔයා මතක තබාගන්න
එහෙනම් මොකද්ද මේ MAG වෙල්ඩින් කියන්නේ
MAG කියන නමේ සම්පූර්ණ තේරුම Metal Active Gas.
මෙහිදීත් MIG ක්‍රමයේ වගේම අඛණ්ඩව පෝෂණය වන පිරවුම් කම්බියක් සහ විද්‍යුත් චාපයක් භාවිතා කරනවා.
නමුත් ප්‍රධාන වෙනස වන්නේ භාවිතා කරන ආවරණ වායු වර්ගය වේ.
MAG ක්‍රමයේදී රසායනිකව සක්‍රීය වායු හෝ සක්‍රීය වායු අඩංගු මිශ්‍රණ භාවිතා කරනවා.
ප්‍රධාන වශයෙන් භාවිතා කරන වායුන් වර්ග
පිරිසිදු Co2
Argon + Co2
ඒවා ආර්ක් එකේ ස්ථාවරත්වයට, උණු වූ ලෝහ බිඳිති කම්බියෙන් වෙල්ඩිමට මාරු වන ආකාරයට, විනිවිද යාමට Pe*******on ස්පැටර් ප්‍රමාණයට සහ වෙල්ඩින් සන්ධියේ හැඩයට බලපෑම් කරනවා.
MAG වෙල්ඩින් බහුලව භාවිතා කරන අවස්ථා මොනවද කියලත් බලමු
1. සාමාන්‍ය කාබන් වානේ Mild Steel වෙල්ඩින් කිරීමට
2. අඩු මිශ්‍ර ලෝහ වානේ වෙල්ඩින් කිරීමට
3. ව්‍යුහාත්මක වානේ නිෂ්පාදනයට
4. වාහන නිෂ්පාදන සහ අලුත්වැඩියා කටයුතු වලට
5. කාර්මික යන්ත්‍රෝපකරණ සහ ලෝහ නිෂ්පාදන වලට
6. විවිධ ඝනකම් සහිත වානේ කොටස් වෙල්ඩින් කිරීමට
ඒ නිසා අපේ වැඩබිම් වල සාමාන්‍ය Mild Steel පෑස්සීමට භාවිතා කරන බොහෝ Solid Wire සහ ගෑස් සහිත වෙල්ඩින් මැෂින් තාක්ෂණිකව MAG ක්‍රියාවලියට අයත් වෙන බව දැන් ඔබට අවබෝධ වෙන්න ඕනී
Co2 ගෑස් භාවිතා කරන්නේ ඇයි
අපි දැන් MAG වෙල්ඩින් සඳහා බහුලව භාවිතා කරන පිරිසිදු Co2 ගෑස් ගැන බලමු.
Co2 යනු සක්‍රීය ආවරණ වායුවක්.
ආර්ක් එකේ අධික උෂ්ණත්වය යටතේ Co2 විඝටනය වී Co2 සහ Oxygen අඩංගු ප්‍රතික්‍රියාකාරී සංඝටක ඇති කරනවා. මේවා උණු වූ ලෝහය සමඟ ප්‍රතික්‍රියා කළ හැකියි.
ඒ නිසා වෙල්ඩින් කම්බියේ අඩංගු Deoxidizer වැනි සංඝටක ද වෙල්ඩින් ලෝහයේ ගුණාත්මකභාවය පවත්වාගැනීමට වැදගත් වෙනවා.
Co2 භාවිතයේ ප්‍රධාන වාසීත් බලමුකෝ
1. සාමාන්‍ය කාබන් වානේ වෙල්ඩින් සඳහා සාපේක්ෂව ආර්ථිකමය වායුවක් වීම ඒ කියන්නෙ ආර්ගන් වලට වඩා මිල අඩුයී
2. සුදුසු සැකසුම් යටතේ හොඳ විනිවිද යාමක් ලබාගත හැකි වීම.
3. විවිධ වානේ නිෂ්පාදන කටයුතු සඳහා භාවිතා කළ හැකි වීම.
නමුත් ඉතින් අවාසිත් තිබෙනවා.
Argon මිශ්‍රණවලට සාපේක්ෂව සාමාන්‍යයෙන් ස්පැටර් වැඩි විය හැකියි.
ආර්ක් එකේ හැසිරීම රළු විය හැකියි.
වෙල්ඩින් සන්ධිය වටා ඇති ස්පැටර් පිරිසිදු
කිරීමට වැඩිපුර කාලයක් ගතවිය හැකියි.
නිවැරදි වෝල්ටීයතාව, වයර් ෆීඩර් වේගය සහ අනෙකුත් සැකසුම් නොමැති නම් වෙල්ඩින් ගුණාත්මකභාවය අඩුවිය හැකියි.
වැදගත් තාක්ෂණික කරුණක්:
පිරිසිදු Co2 භාවිතා කරන විට ප්‍රධාන වශයෙන් Short Circuit සහ Globular වැනි Metal Transfer ක්‍රම දක්නට ලැබෙනවා. මම කලින් ලිපියක් පලකර ඇත අවශ්‍යයී නම් කියවන්න
නමුත් පිරිසිදු Co2 සමඟ සාමාන්‍ය Spray Transfer හෝ Pulsed Spray Transfer ක්‍රම ලබාගත නොහැකියි. ඒ සඳහා සාමාන්‍යයෙන් Argon වැඩි ප්‍රතිශතයක් සහිත සුදුසු මිශ්‍රණයක් අවශ්‍ය වෙනවා.
Argon සහ Co2 මිශ්‍ර කරන්නේ ඇයි
MAG වෙල්ඩින්වල තවත් වැදගත් තාක්ෂණයක් තමයි Argon සහ Co2 නිශ්චිත ප්‍රතිශතවලින් මිශ්‍ර කර භාවිතා කිරීම.
Argon මගින් ආර්ක් එකේ හැසිරීම සහ ලෝහ බිඳිති මාරු වන ආකාරය පාලනය කිරීමට උපකාරී වෙනවා.
Co2 මගින් ආර්ක් ලක්ෂණ, විනිවිද යාම සහ වෙල්ඩිමේ හැසිරීම වෙනස් කරනවා.
ඒ නිසා නිවැරදි ප්‍රතිශතය තෝරාගැනීමෙන් ආර්ක් ස්ථාවරත්වය, ස්පැටර් ප්‍රමාණය, විනිවිද යාම සහ වෙල්ඩින් සන්ධියේ හැඩය අතර අවශ්‍ය සමබරතාව ලබාගන්න පුළුවන්.
අපි උදාහරණ කිහිපයක් බලමු.
75% Argon + 25% Co2
මෙය 75/25 හෝ C25 මිශ්‍රණය ලෙස හඳුන්වනවා.
කාබන් වානේ වෙල්ඩින් සඳහා භාවිතා කරන මිශ්‍රණයක්. පිරිසිදු Co2 වලට සාපේක්ෂව ආර්ක් එකේ හැසිරීම සහ ස්පැටර් ප්‍රමාණය වෙනස් වෙනවා. නිවැරදි සැකසුම් යටතේ හොඳ විනිවිද යාමක් ලබාගන්න පුළුවන්.
80% Argon + 20% Co2
මෙයත් කාබන් වානේ වෙල්ඩින් සඳහා භාවිතා කරන ජනප්‍රිය මිශ්‍රණයක්.
ආර්ක් ස්ථාවරත්වය, ස්පැටර් ප්‍රමාණය සහ විනිවිද යාම අතර අවශ්‍ය සමබරතාව ලබාගැනීමට භාවිතා කරනවා.
82% Argon + 18% Co2
මෙයත් කාබන් වානේ සඳහා බහුලව භාවිතා කරන මිශ්‍රණයක්.
සාමාන්‍ය නිෂ්පාදන කටයුතු සහ වැඩබිම් වල වෙල්ඩින් සඳහා ප්‍රයෝජනවත් වෙනවා.
90% Argon + 10% Co2
Argon ප්‍රතිශතය වැඩි මෙම මිශ්‍රණය සුදුසු සැකසුම් යටතේ Spray Transfer සහ Pulsed Transfer වැනි ක්‍රම සඳහා භාවිතා කළ හැකියි.
ස්පැටර් අඩු කිරීම, ආර්ක් ස්ථාවරත්වය සහ වෙල්ඩින් සන්ධියේ මතුපිට ගුණාත්මකභාවය වැඩිදියුණු කිරීම මෙහි වාසි අතරට අයත් වෙනවා.
මතක තබාගන්න.
Co2 ප්‍රතිශතය වැඩි වීමෙන් හැම අවස්ථාවකදීම විනිවිද යාම වැඩි වෙනවා කියලා සරලව තීරණය කරන්න බැහැ.
එය කම්බියේ වර්ගය, ධාරාව, වෝල්ටීයතාව, වයර් ෆීඩර් වේගය, වෙල්ඩින් වේගය සහ භාවිතා කරන Metal Transfer ක්‍රමය වැනි කරුණු මත වෙනස් වෙනවා.
ඒ වගේම මේ මිශ්‍රණවලින් එකක් හැම ඝනකමකටම, හැම කම්බි වර්ගයකටම සහ හැම වෙල්ඩින් ක්‍රමයකටම සුදුසු නැහැ.
මොකද්ද මේ Argoshield කියන්නේ
ඉතින් ඔයාලා Argoshield කියන නම වෙල්ඩින් ක්ෂේත්‍රයේ බොහෝ දෙනෙක් අහලා ඇති
මෙය එකම ගෑස් සංයුතියක් නොවෙයි. විවිධ වෙල්ඩින් කාර්යයන් සඳහා විවිධ සංයුති සහිත Argoshield වර්ග තිබෙනවා.
ඒවායේ Argon සහ Co2 වැනි වායු අඩංගු කර කලම් කර කලවම් වායුවක් ලෙස භාවිතා කරනවා, මේ සම්බන්දවත් දිර්ඝ වීඩීයෝවක් ඉදිරිපත් කර ඇත අවශ්‍යයී නම් නරඹන්න
MIG සහ MAG අතර ප්‍රධාන වෙනස මොකද්ද
දැන් අපි මේ දෙකේ වෙනස සරලව තේරුම් ගනිමු.
MIG
නිෂ්ක්‍රිය ආවරණ වායු භාවිතා කරනවා.
Argon සහ Helium ප්‍රධානයි.
ඇලුමිනියම්, මැග්නීසියම්, තඹ සහ නිකල් වැනි ෆෙරස් නොවන ලෝහ සඳහා බහුලව භාවිතා කරනවා.
ආවරණ වායුව සාමාන්‍ය වෙල්ඩින් තත්ත්වයන් යටතේ උණු වූ ලෝහය සමඟ රසායනිකව ප්‍රතික්‍රියා කරන්නේ නැහැ.
MAG
සක්‍රීය ආවරණ වායු හෝ සක්‍රීය වායු අඩංගු මිශ්‍රණ භාවිතා කරනවා.
Argon + Co2 වැනි වායු භාවිතා කරනවා.
කාබන් වානේ සහ අඩු මිශ්‍ර ලෝහ වානේ සඳහා බහුලව භාවිතා කරනවා.
ආවරණ වායුව ආර්ක් එකේ හැසිරීමට සහ වෙල්ඩින් ලෝහයේ ගුණාංගවලට බලපෑම් කරනවා.
ඒ නිසා MIG සහ MAG අතර වෙනස තීරණය වෙන්නේ මැෂින් එකේ හැඩය, ප්‍රමාණය හෝ පෙනුම අනුව නොවෙයි. භාවිතා කරන ආවරණ වායුවේ රසායනික ස්වභාවය අනුවයි.
තාක්ෂණිකව මේ ක්‍රම දෙකම GMAW Gas Metal Arc Welding යන පුළුල් නාමය යටතට අයත් වෙනවා.
අවසාන වශයෙන්...
අපේ රටේ බොහෝ දෙනෙක් සාමාන්‍යයෙන් MIG වෙල්ඩින් කියලා හඳුන්වන ක්‍රියාවලීන්ගෙන් විශාල ප්‍රමාණයක් ඇත්තටම MAG වෙල්ඩින්.
පිරිසිදු Co2 භාවිතා කළත්, Argon සහ Co2 මිශ්‍රණයක් භාවිතා කළත් ඒවා MAG ක්‍රමයට අයත් වෙනවා.
පිරිසිදු Argon හෝ Argon සහ Helium වැනි නිෂ්ක්‍රිය වායු භාවිතා කරන විට එය MIG ක්‍රමයට අයත් වෙනවා.
මේ වෙනස දැනගැනීම වෙල්ඩින් ශිල්පියෙකුට පමණක් නොවෙයි, වෙල්ඩින් මැෂින් අලෙවි කරන, අලුත්වැඩියා කරන සහ නිෂ්පාදනය කරන සියලු දෙනාටම වැදගත්.
මැෂින් එකක් තෝරාගන්නා විට එහි ඇම්පියර් ප්‍රමාණය පමණක් නොව, භාවිතා කරන කම්බිය, ආවරණ වායුව සහ වෙල්ඩින් ක්‍රියාවලිය ගැනත් නිවැරදි අවබෝධයක් තිබිය යුතුයි.
තාක්ෂණය දැනගෙන වැඩ කරමු. නිවැරදි දැනුම බෙදාගනිමු.
WELD DOC ELECTRONICS
ජයවේවා ඔබ සැමට❤
අද ලිපියත් හොදයී නම් අපිව follow කරන්න ,
Like ,comment කරන්න යාලුවන්ට බලන්න shear කරන්න
