21/08/2026
لنكن واضحين
المنطقة ديال عين بني مطهر او الاقليم كل ما خصهش ورشات كبرى باش يزدهر , ماخصناش مشاريع كبرى اللي كتتفتح وتبقا بدون استغلال او بدون فائدة راه شحال من حاجة عندنا مفتوحة ومافيهاش الاطر اللي يقابلوها يعني ما الفائدة الى كان واحد المستشفى كاين والمعدات كاينة او واحد المصنع او او والناس اللي تخدم فيه مكايناش او كنتسناو نجيبوا من مدينة اخرى ...
التحدي الاكبر قبل الاوراش هو الشباب لحقاش كاين الشباب اللي عندهم الخبرة والتجربة والامكانيات والايني مكيلقاوش فين وكاين اللي معندهم والوا ومخصناش نسمحوا فيهم , كاين اللي كيخرج من المدينة ويمشي يضبر خدمة فمنطقة اخرى باش يخدم على عائلته , وكاينين تا فتيات الله يكون فالعون اللي كيضطروا يسافروا باش يعيلوا اسرهم
المنطقة مخصهاش اوراش كبرى خصها مشاريع تنموية صغيرة الشاب او المواطن مباغي شي حاجة اكثر من انه يلقا باش يعيش ياكل يشرب يداوي وكنعرفوا اسر افرادها يتجاوز 5 6 راها عايشة كلها ب 3000 او 4000 درهم وكتقول الحمد لله ومع الوقت رب يزيد ويبارك فالرزق .
وباش منمشيوش غالطين فواحد المسالة وهو نبقاو نلومو فبعضياتنا او نلومو شي مسؤول او شي جهة , قبل منديروا دكشي خصنا نعرفوا باللي شي مرات راه الانسان كيدير كل ما فطاقته (وكنهضر على الانسان اللي كيخاف الله وباغي يخدم ويزيد بالمنطقة للقدام واللي عندوا نية اخرى بينه وبين اللي خلقه ) , ومع الاسف مكيتمكنش يحل كلش المشاكل حقاش راه الله يكون فالعون المساطر الادارية مساهلة على تا شي حد وماشي غير يقول واحد المسؤول على شي حاجة تندار معناتها غادي تندار بالعكس راه عندها دراسات وتشاورات وميزانيات وبزاف اشياء .
وشي مرات العقلية ديال المنطقة كتحكم , الى انا شاب وشفت واحد الشخص اخر ماشي فطريق الخير منحسدهش ولا نضيق عليه , حنا بالعكس اللي شاف شي حاجة يمشي يديرلها كوبي كولي وهدا غلط , صحيح انك دير مشروع مي ماشي بضرورة داحس خوك فنفس البلاصة باش تبلع عليك وعليه راه الرزاق الله والرزق مكاينش فبلاصة وحدة
عجبني واحد المثال شفته فواحد المدينة ديال تيزنيت والنواحي , تخيلوا معايا الجمعيات والمحسنين كيتكلفوا للطلبة اللي مفحالهم وللتلاميد وغيرهم باش يوفرولهم جيميع الوسائل باش يقراو ويفوتوا السنة الدراسية وينجحوا وكاين اللي بناو مؤسسات صغيرة او شراو طرونسبور او المهم بزاف امور وهدا غير مثال .... حقاش الخير مكيحتاجش نسنا شي واحد يديره , الى لقيت حفرة فالطريق خسر عليها كيلوا سيمة وشوي رملة وبلعها وراك تدي الاجر ورزقك على الله .
حنا الجمعيات او التعاونيات اللي عندنا فالمنطقة كاين اللي كتستافد من الدعم وايني الى جينا نشوفو نسب توظيف الشباب غادي نلقاوها شبه منعدمة لحقاش كنديروا اوراش تافهة, الناس مخصهاش نشاط ديال لموسيقى ولا دورة تكوينية فيها يومين والله يعاون , ناس خصها تعطيها الطريق فين تخدم (ومكنهاجم تا واحد هنا كنقول راي فقط).
وحنا اللي دار شي خير ولا شي اجر فهاد المنطقة خصه يعرف باللي ماراهش كيتكرم عليها ولا على ساكنتها , ولا الى هو مادارش دكشي معناتها راه مغاديش يندار , بالعكس خصنا نعرفوا باللي رانا ابناء منطقة وحدة ونهار يموت اي واحد فينا غادي يمشيو معه اهل المنطقة يدفنوه , فراه كل واحد كيدير وكيدير فالخفاء وكيسكت راه كاين اللي كيتصدق على الفقراء وكيسكت كاين اللي كيغرس الشجر وكيسكت كل واحد من ابناء المنطقة راه كيدير اللي يقدر عليه وكاين اللي كيخرب تاهو مثلا النافورة او ديك المنطقة هرسوها وتاهادا محسوب انه كيساهم فالمنطقة بالصح مكايعاونهاش .
مجموع ساكنة عين بني مطهر فاخر احصاء كان 19,701 شخص , الى درنا كل شهر كل شخص يساهم بدرهم فقط غير درهم واحد راهم عندنا كل شهر 20000 درهم يعني 2 ملاين كل شهر نقدروا نديروا حاجة فهاد المنطقة يا نعاونوا مجموعة شباب يا نصاوبوا شي حاجة ونشوفو شراكات ودعم و و و ...
كيبقا راي ديالي كشاب من المنطقة ساكن فيها 28 سنة واحتككت مع شباب المنكقة وكبارها وشيوخها وكلش .
![﴿ذَلِكَ مِنْ فَضْلِ اللَّهِ عَلَيْنَا وَعَلَى النَّاسِ وَلَكِنَّ أَكْثَرَ النَّاسِ لَا يَشْكُرُونَ﴾ [يوسف: 38]يشرفني أن ...](https://img5.computers1000.com/537/504/1008785735375044.jpg)
