28/02/2026
Bariga Dhexe ayaa maanta galay marxalad dagaal oo toos ah kadib markii Israel, iyadoo iskaashi la leh Mareykanka, ay duqeymo ka fulisay gudaha Iran, gaar ahaan caasimadda Tehran. Warbaahinta caalamka ayaa werisay in qaraxyo xooggan laga maqlay Tehran, halka Washington ay xaqiijisay ka-qaybgalka howlgalka.
Ra’iisul Wasaaraha Israel, Benjamin Netanyahu, ayaa sheegay in howlgalka lagu doonayo in meesha laga saaro “hanjabaad jiritaan” oo ka imanaysa Iran, halka Madaxweyne Donald Trump uu ku dhawaaqay in Mareykanku ku jiro “howlgallo dagaal oo waaweyn.”
Israel ayaa isla markiiba ku dhawaaqday xaalad degdeg ah oo qaran, shacabka ayaa lagu amray inay raacaan tilmaamaha amniga, hawadana waa la xidhay.
Dhanka kale, Ciidanka Ilaalada Kacaanka Iran (IRGC) ayaa ku dhawaaqay inay jawaab ka bixiyeen duqeymaha, iyagoo sheegay inay boqollaal gantaal iyo diyaarado aan duuliye lahayn ku weerareen xarumo istaraatiiji ah oo gudaha Israel ah. AFP ayaa werisay in qaraxyo laga maqlay Qudus, halka warbaahinta Israel ay sheegtay in gantaallo ay ku dhaceen waqooyiga gobolka Galilee, qiiqna laga arkay meelo kala duwan.
Taliska Ilaalada Gudaha Israel ayaa shacabka ku amray inay galaan goobaha loogu talo galay, iyadoo nidaamka digniinta weerarrada laga shiday guud ahaan dalka. Ciidanka Israel ayaa sheegay inay wajahayaan “weerar ballaadhan oo gantaallo ah,” halka mas’uuliyiin Iran ah ay ku adkaysteen in jawaabtoodu tahay mid adag oo aan waqti xadidnayn lahayn.
Isdhaafsiga duqeymaha iyo gantaallada ayaa si weyn u kiciyay cabsi laga qabo in dagaalku sii fido, iyadoo indhaha caalamku ku jeedaan tallaabooyinka xiga ee Tehran, Tel Aviv iyo Washington. Gobolka ayaa haatan ku jira xaalad kacsanaan heer sare ah oo halis u ah xasilloonida Bariga Dhexe oo dhan.
