03/02/2026
ايه السبب اللي بيخلي براندات معينة تنتشر وتحقق نجاح كبير في وقت قليل؟
كل برامج السوشيال ميديا هدفها الاساسي هو جذب انتباهك وانك تفضل موجود ومتصل بالساعات وبالتالي بيدعموا اي نوع محتوي يجذب انتباهك ويخليك متابع لاطول فترة انه ينتشر
وعشان كده الطرق القديمة في الاعلانات شبه انتهت, في الاول كان الموضوع بسيط بتعمل تصميم فيه مميزات المنتج وتقول يا جماعة اشتروه وهوب تلاقي مبيعات للصبح, لكن دلوقتي؟
العميل من كتر ما اتلسع بقا واعي وفاهم ومش هيشتري منك غير لو قدرت تحقق العناصر دي.
1- قدرت تجذب انتباهه ليك ويكمل معاك بطرق مختلفة
2- اتكلمت عن ان المنتج ده هيحل مشاكله لانه فيه كذا كذا
3- خليته يشوف آراء للاشخاص اللي اشتروا وعجبهم المنتج
4- حسسته ان مش هدفك البيع لكن هدفك حل مشكلته (واللي هي ممكن متكونش موجودة وانت تخلقها)
العامل المهم هنا هو الكرييتف, ده اللي بيحدد العميل هينجذب ويقرأ المحتوي اللي يخليه ياخد اجراء او لا, والكرييتف هنا تقدر تنوع مابين فيديو وصور وديزاين لكن لازم يكون بطريقة خاطفة والعميل مش متعود يشوفها زي مثلا هوك الشخص اللي بيرمي كورة تخبط في الشاشة ويجي فيديو المنتج او اغنية معينة تألفها للمنتج او تسرد قصة عن ازاي العالم كان بيعاني من مشاكل والمنتج ده قدر يحلها او تستخدم ال UGC في انه يقول رأيه في المنتج ومميزاته
وغيره كتير من الافكار اللي تقدر تنفذها بالAI كانت صعب تتنفذ قبل كده
المهم هو انك تخرج برة الصندوق بأساليب جديدة تخطف عين العميل المحتمل.
عن نفسي غيرت الطرق التقليدية القديمة اللي كان بيستخدمها عملائي وبقيت بدور علي طرق جديدة كل شوية تجذب الانتباه ونقدر نحقق من خلالها مبيعات اكتر.
