04/05/2026
شحال من مرة صراتلك، راك تتفرج فيديو ولا تيليشارجي في كاش عفسة مهمة، وفجأة يعيطلك كاش واحد، الكونيكسيون تتقطع وتبقى غير تستنى. هاد المشكل الكلاسيكي خلاصت حكايتو الان مع الإطلاق الرسمي لخدمة VoLTE في الجزائر من عند المتعامل جازي.
مور الخبر الحصري لي حطيناه، بزاف منكم سقساونا واش هي هاد التقنية. باختصار وبلا مصطلحات معقدة، هاد الخدمة تخليك دير مكالماتك مباشرة على شبكة 4G، في بلاصة ما يهبط التليفون اوتوماتيكيا للجيل الثالث كيما كان يصرا من قبل.
هاد التطور راح يبدلك طريقة استعمالك للتليفون في 3 حوايج اساسية:
✅ الاولى الكونيكسيون ماتروحش: شبكة 4G ماراحش تتقطع كي تكون تهدر، وتقدر تتصفح وتكونيكتي ولا تبعت تصاور في نفس الوقت عادي جدا.
✅ الثانية جودة الصوت: المكالمات تولي نقية وواضحة بزاف.
✅ الثالثة سرعة الاتصال: التليفون يصوني عند الشخص لي عيطتلو في رمشة عين.
باش تستفاد من هاد الخدمة، لازم برك التليفون تاعك يكون يدعمها، و تدخل لاعدادات الشبكة وتفعل خيار مكالمات الجيل الرابع.
شاركونا في التعليقات واش من تليفون عندكم، وهل تاكتيفات عندكم الخدمة وبانت العلامة الفوق ولا مزال.
