07/12/2015
6 خطوات للنجاح فى تسويق الB2B
فى الاول كدا ... الB2B هو التسويق ما بين شركة لشركة او بيزنس لبيزنس تانى -Business to Business و هو من اهم و اغلى انواع التسويق عموما لانه بيتطلب نوع معين من العلاقات الخاصة و طرق التعامل و ادراك قوى باحوال كل الاسواق و دول اهم 6 خطوات للنجاح فى التسويق الB2B :
1- اعرف تكلم مين
من المهم جدا انك تكون مدرك لشكل و مسار السلطة و القدرة على اتخاذ القرارات فى مجال الشركات المستهدفة .. وتدرك ان مش شرط تكلم اعلى سلطة عشان تقفل الDeal فى اوقات كتيرة الموظفين المتوسطين بيكون ليهم السلطة للتعامل مع بعض الصفقات (و فى الحالة دى بيبقى الDeal فى صالحك اكتر).
2-حسن موقعك الكترونى
اهلا بك فى القرن ال21 .. لو شركتك بتعتمد فى تسويقها على الB2B -استيراد, ايراد, توزيع و غيره - و معندكش موقع الكترونى ، اعمل حسابك انك مش هاتستمر و سهل جدا يجى غيرك وياكل منك السوق.
لازم يبقى ليك موقع للشركة و تحسن محتواه كل فترة معينة -جوجل بتحب المواقع المتجددة دايما و بتعلى نتائج بحثها - و لازم تطوره و تطور شكله باستمرار (الفيس بوك مش خانقنا بتصميم كل شوية ع الفاضى :D )
3- التسويق و التسويق و التسويق ... الى ما لا نهاية !
لو شبهنا اى بيزنس فى الدنيا بجسم البنى ادم, فالتسويق هو الرجلين اللى بتمشّى الجسم كله وراها ، و اللى بتحدد مستقبل البيزنس بشكل كامل.
و طبعا أفضل انواع التسويق هو التسويق الاكترونى عشان بيوصلك بالالاف فى خبطة واحدة (و هانتكلم عن التسويق الالكترونى و خطواته و ادواته فى بوست تانى)
4- دوّن .. و سمع الدنيا صوتك
اعمل مدونة من على blogger او حتى اعمل صفحة على الفيس (طبعا لو عندك موقعك فيه المدونة بتاعتك ما تشغلش بالك بالكلام ده ^_^ ) .. اكتب حاجة تفيد الناس فى مجال شغلك, حتى لو كنت مخزن خشب ! اكتب عن انواعه او عن اسعاره او مثلا 5 نصايح للتخزين الجيد للاخشاب و هكذا .. كن اونلاين :D
5- قاعدة بيانات لكل عملائك القدام
الخطوة دى بيعملها الناس اصحاب المدارس القديمة فى التسويق و للغرابة تقريبا جزء كبير مننا (العالم بتوع النت :D ) مش بنهتم بيها على الرغم انها من اهم المعلومات اللى لازم نحتفظ بيها و يكون فيها التليفونات و الأكونتات و الأيميلات و العناوين و كل حاجة تتواصل معاه من خلاله .. و ده عشان الخطوة اللى جاية :
6- اهتم بالعملاء و المشترين حتى بعد التسليم
مش معنى انه مضى على العقد و اداك فلوسك تنساه .. العميل اللى اتعامل معاك من اهم ادواتك التسويقية, دايما تكون على تواصل معاه و تاخد منه معلومات عن اداء الخدمة او المنتج و انه لو عايز تانى و غيره .. "العميل اللى خد خدمته هو عميل محتمل لنفس الخدمة ^_^ " .
بالملخص المفيد .. عنيك دايما على اهم تلات اصول عندك : شريحة عملائك - نظامك الادارى - و التسويق عموما ان كان لشخصك او لشركتك او خدمتك (و هايكون لينا بوست فى الفرق ما بين كل جزء ^_^ )
