11/01/2020
يعني ايه فيجا وايه علاقتها بالالعاب والبرامج وازاي اختار فيجا مناسبه ليا والفرق بين انواع الفيجات ؟
النهارده هنتكلم عن الفيجا "VGA Card " او كارت الشاشه او كرت الفيديو او البطاقه الرسوميه كل دي مسميات لقطعه صغيره في الجهاز مسئوله عن كل شئ عينك بتقع عليه في الشاشه سواء بقي ايقونات او خطوط او ملفات او صور وفيديوهات والعاب وبرامج
بمعني ان هي المسئوله عن اي حاجه بصريه انت بتشوفها علي شاشة اللاب توب او الكمبيوتر
علشان كدا الناس اللي بتشتغل جرافيك او الجيمرز اللي بيهتموا بالالعاب الحديثه بيهتموا جدا بالقطعه دي لانها المسئوله عن جودة وسرعة الجهاز في عرض تفاصيل الصوره علي الشاشه وتلاقي الالعاب الحديثه بتطلب لتشغيلها انواع عاليه من كروت الشاشه لان الجرافيك المستخدم فيها بيكون عالي زي FIFA 18 و PES 18 وغيرهم من الالعاب وكذلك البرامج الهندسيه زي 3Dmax و الفوتوشوب وبرامج الريندر والمونتاج
-طيب ايه هي انواع كروت الشاشة
فيه نوعين لكروت الشاشة:
الاول : الكارت المدمج اللي بنقول عليه " فيجا داخليه " او Built-in
والنوع دابيكون مرتبط باللوحة الأم "Mother Board".
التاني : الكارت المنفصل عن اللوحة الأم أو الكارت الخارجي."الفيجا الخارجيه"
-طيب لو بشتري فيجا للجهاز بتاعي او بشتري جهاز وعايز اعرف الفيجا دي هتناسب احتياجاتي ولا لا
فيه حاجتين مهمين جدا لازم تراعيهم وانت بتشتري اي فيجا
1- ان يكون فيه تناسب بين امكانيات الفيجا اللي بشتريها وامكانيات جهازي
يعني مروحش اشتري فيجا من فئه عاليه والبروسيسور عندي ضعيف واقول هو ليه الفيجا مبتخدمش علي احتياجاتي ومتحسش بفرق
2- طبيعة الاستخدام : يعني تسال نفسك الاول انا محتاج اشغل جهازي في ايه هل انا بحب الالعاب ولا طبيعة شغلي بتحتاج برامج تقيله ولا خفيفه ولا هستخدمه في التصفح ومشاهدة الافلام
وبناء عليه لو هتستخدمه في امور خفيفه زي تصفح النت ومشاهدة فيديوهات وكدا فانت ممكن تكتفي بالكارت المدمج الموجود في المازر بورد للجهاز
انما لو استخدامك لالعاب وبرامج تقيله زي برامج التصميم مثلا فانت هتحتاج فيجا من فئه عاليه من اصدارات Nvidia او AMD مثلا
طيب لو انا بقي قدامي 2 فيجا من نوعين مختلفين وعايز اعرف الفرق بينهم وايه الافضل واللي انا محتاجه منهم
بص يا معلم فيه شوية حاجات كدا في الفيجا لازم تاخد بالك منها
ايه هي الحاجات دي بقي ؟
ورقه وقلم واكتب معايا
1- الدقة او Resolution
2- سرعة المعالج او GPU Speed
3- سرعة الذاكرة او Memory Speed
4- سرعة الرام داك او RAMDAC Speed
5- دعم الكرت لبرنامج دايركت اكسDirect X
6- زمن الوصول
7- خطوط المعالجة او Pipeline
8- عرض حزمة الناقل Band Width
9- معدل الإنعاش Refresh Rate
10- معالج الكرت او GPU unit
11- بيوس الكرت او Card BIOS
وبناء علي الحاجات دي هتقدر تحدد الافضل
ولو انت ملكش في الموضوع دا خالص تقدر تستعين بحد من اهل الخبره في مبيعات الكمبيوتر او الناس اللي شغالين في الجرافيك او الجيمرز بس لازم يكون عندك خلفيه عن الحاجات دي علشان تبقي فاهم هو بيحددلك بناء علي ايه
المره الجايه هنفرق بين انواع الفيجات بالتفصيل زي الفرق بين فيجا AMD و Nvidia
متنساش شير للبوست علشان تفيد غيرك
ولو عندكم اضافه او تعديل شاركوها معانا في الكومنتات
