28/11/2022
أسباب رفض فيزا شنجن :
ناس كتير باعتتلي أنها قدمت على فيزا شنجن و جالها رفض و مش عارفه ايه السبب مع أن أوراقها كامله و سليمة, و مش عارفه ايه الخطوة الجاية بعد الختم المنيل اللي اتختم بيه على باسبورنا بالرفض ( هل حتظل علامة عار في جواز سفرنا لمدة 7 سنين طيب هل ممكن نقدم تاني , طيب ينفع أعمل استئناف ؟؟ ) أسئله كتير أكيد بتدور في ذهنك بعد الرفض الأليم من السفاره . لو الموضوع يهمك كمل قراءة الموضوع و ان شاء الله على الأقل حتفهم القصه ماشية أزاي , و لو بردو بتفكر أنك تقدم على شنجن أكيد الموضوع حيهمك علشان متقعش في الأخطاء دي :)
خلينا الأول نعرف أسباب الرفض : بعد ما بيتم الرفض ( لا قدر الله ) بيدولك في السفاره ورقة و مكتوب فيها سبب الرفض و بيكون أمامك 30 يوم تقدر فيهم تعمل طلب استئناف
فيه 11 نقطه ممكن يتم الرفض بسببها لكن أهمهم :
2- طالب التأشيرة لم يبرر غرض وشروط الزيارة المطلوبة. : و ده أهم و أكثر سبب للرفض و بيكون لو الموظف غير مقتنع بأسباب الزياره , يعني أنت موضحتش كويس مسافر ليه , و مش موضح خط سير الرحلة أو لم يتم تقديم الأصول كوثيقة التأمين أو خطاب العمل, أو كشف الحساب , أو انتهت صلاحية المستندات المقدمة كأن تقدم تأمين منتهي أو خطاب عمل قديم, أو المستندات المقدمة لا تتناسب مع هدف الرحلة كأن تقدم كشف حساب ضعيف و انت ذاهب للسياحة,, أو معلومات غير صحيحة عن هدف الرحلة كأن تقدم اوراق دراسة و تختار سياحة بالنموذج,,أو لم تقدم مستندات تثبت صلة القرابة لاشخاص مسافرين معك,, لم تقدم خطاب عمل أو ما يثبت وجود وظيفة لديك ,,أو حجوزات الطيران و الفنادق تم الغائها بعد التقديم للفيزا , كل دي أسباب ممكن تؤدي الى رفض الفيزا و يدولك رفض للسبب ( 2) فركز أوي أن ورقك كله يكون سليم و عامل خط سير الرحله مظبوط و مسجل بالتفصيل كل يوم حتعمل ايه .
3- طالب التأشيرة لم يقدم أدلة على امتلاكه للموارد المالية الكافية لعيشه أثناء الزيارة ولعودته إلى بلده الأصلي : و ده سببه ضعف الحساب البنكي، خصوصا عند أول طلب للتأشيرة ,,أو عدم تقديم كشف حساب أو تقديم كشف حساب بمدة أقل من المطلوب , أو عدم تقديم كشف الحساب على أوراق البنك , أو عدم كفاية الرصيد في البطاقة الائتمانية
المبلغ المعتاد للحصول على شنجن ان حسابك يغطي 70 يورو لكل يوم و انت مسافر و حد ادنى 600 يورو . يعني لو ذكرت انك مسافر لـ 15 يوم اضربها في 70 يورو = 1050 يورو= 9000 جنيه تقريبا , ناس حتقول كان حسابي فيه 100 الف و متقبلتش و ناس بيكون في حسابها 20 الف و بتتقبل !! الموضوع كله كالاتي , موظفين السفاره فاهمين كويس أوي من كشف الحساب الفلوس دي اتحطت أمتى بالظبط و هل فعلا المبلغ ده عليه سحب و ايداع لمدة 6 شهور و لا محطوط فقط للحصول على الفيزا , فتاريخك المالي خلال 6 شهور باين كويس في كشف الحساب , فحاول قبل ما تسافر ب 6 شهور أن يكون فيه مبلغ كويس في البنك و يكون عليه سحب و ايداع لمدة 6 شهور .
8- المعلومات المقدمة لتبرير أهداف وشروط السفر المطلوب لا يمكن الإعتماد عليها: شبيهة برقم 2 .. نضيف لها الحجز الفندقي غير المؤكد , أو يكون الضامن معندوش عمل جيد أو ضمانات كافية ليتكفل بك خلال السفر, يعني لو قدمت أن مثلا قريب ليك حيتكفل بزيارتك لازم يكون عنده مهنه كويسه و سكن مناسب و كل ده بتكتبه في الابليكشن , لو هو حالته الماديه مش كويسه حتاخد رفض , ( أنا رأيي : حتى لو عندك قريب أو صديق في البلد اللي حتزورها متجبش سيرته لأنك لازم تكتب كل حاجه عنه بالتفصيل و لو هو عنده أي مشكله في عمله أو اقامته أو سكنه حتاخد رفض وش ) فأنت قدم سياحه حالك حال غيرك و سيبها على الله .
9- طالب التأشيرة لم يقدم أدلة كافية على نيته مغادرة فضاء شنغن بعد انقضاء مدة صلاحية تأشيرته : هي الحالة الشائعة جدا و دي حق للموظف يكتبها لو شك فيك 1% أنك مش راحع تاني , و أسبابها أن لم يتم تقديم خطاب عمل أو خطاب تعريف دراسي ,يعني ( معندكش مهنه ثابته و راتب محترم حترجع علشانه تاني ) او لم يتم تقديم خطاب من ولي الأمر للسفر ( يعني تكون طالب و مقدمتش موافقة ولي الأمر انك تسافر لوحدك و انه متكفل بمصاريفك ) , أو تم استعمال فيزا سابقة لغير ما أصدرت له ( كأن تستخرجها من المانيا و تذهب للنمسا ) , أو تغيير البيانات كالحجوزات بعد اصدار الفيزا سابقاً , أو لم تقدم حجوزات طيران مؤكدة
طيب ايه العواقب المترتبة على رفض طلب فيزا شنغن
• رفض اعطائك فيزا و ختم جوازك يعني أنه قد تم تسجيل بياناتك في النظام الموحد لدى جميع قنصليات الشنغن.
• في حال رفضك لاقدر الله سيكون أمامك 30 يوماً فقط للإستئناف.
يعني ايه استئناف : الأستئناف ده كأنك بتقول أنك مش موافق على الرفض و أن ورقك كله سليم و في الحاله دي ورقك مش بيروح لنفس الموظف اللي رفضك , و لكن بيروح لرئيسه في العمل و لكن خلي بالك حيتم التدقيق عليه أكتر من الأول و لو فعلا كل شيء سليم 100% ممكن جدا يديلك موافقه . ( و لكن الصراحه الموضوع ده بيتم نادراً و لكن بيتم )
تبدأ بتعمل خطاب استئناف فوراً علشان تكسب الوقت و تكتبه بصيغة رسمية و تحاول الاجابة على أسباب الرفض و تبريرها كتابياً مع ارفاق ما يدعم ذلك بمستندات, و متقدمش نفس الورق اللي قدمته قبل كده لأن كله موجود عندهم , ( الاستئناف بينفع فقط في حالة أنك تقدم معلومات جديدة , أنت أصلا مقدمتهاش في المرة الأولى و جالك رفض بسببها )
اتمنى من الجميع الحرص على تقديم معلومات صحيحة دائماً لأن رفض الفيزا مش حاجه سهلة و لاحظت أن الكثير يتساهل في استخراج فيزا الشنقن من أي سفارة رغم أن النظام ينص على استخراجها من الدولة الأكثر اقامة او الدولة اللي حتزورها أول حاجه ,, فدائما السؤال الشائع ماهي أسهل سفارة استخرج منها الشنقن ؟ و اجابته أن مافيش سفاره سهله و سفاره صعبه , الموضوع متوقف على أوراقك و تظبيطها و الموظف اللي حيقع تحت أيده الورق يأما تقنعه من خلال الورق يأما ميقتنعش و يديلك رفض. و اتمنى من الجميع التدقيق على كل المستندات اللي بيقدموها و التأكد بأنها مكتملة و خلي بالك أن أهم المستندات هي ما يختص بالقدرة المالية و كشف حسابك لأن ده غالبا دائما بيكون سبب رفض أساسي , غير كده الباقي كله بسيط ان شاء الله.
