06/12/2018
درجن..درجن..درجن..درجن 🎶🎶
Eyad Essam
صباح الخير يا عم مجاهد .. ايه انت لسه بردو زعلان منى .. ياعم مجاهد انت ظالمنى .. ورحمة ابويا انت ظالمنى انت عارف المعلم عطية كان بيدفع ايجار للقهوة قد ايه كل شهر ؟ .. خمسة جنيه وستين قرش وايجار الشقة كان بيروح للمية .. والمرتب عملت توكيل لامى تقبضه اول كل شهر علشان مصروف البيت .. بتكلمنى عن ايه .. عن الحشيش .. الحشيش ده هوه الذنب الوحيد اللى ف حياتى .. بعد ما ماتت ام يوسف مكنش عندى حتى بنى آدم اكلمه .. انا بكلم الناس حوالين الجوزة بفضفض .. بضحك واغنى بحاجة حلوة لغاية مموت بيت ايه اللى انت بنيته مع ابويا طوبة طوبة .. كنت فين انت ياعم مجاهد قدرت تعمل ايه لما مرات ابويا خدت الشقة وديتها لولدها هه .. عملت ايه .. الحكتية مش حكاية البيت ياعم مجاهد ..المشكلة مشكلة الناس اللى عايشة .. ولازم تعيش .. ماتظلمنيش يا عم مجاهد .. لا مؤاخذة يعنى مغرفة الفول اللى كانت بمليم بقت دلوقتى بنص ريال .. سلام عليك سامحنى يا عم مجاهد .. وادى ايدك كمان ابوسها ... الله .. عم مجاهد .. عم مجاهد .. عم مجاهد .. لا اله الا الله .. لا اله الا الله !
فاطمة : ياخويا بيقولوا انك بتدق حلو عالعود .. عارف .. انا نفسى تدقلى عالعود وانا ارقص .. والنبى ده انا برقص احسن من فيفى عبده
يوسف : طول عمرى كنت خايف من المازيكا اللى فسدت عقل ابويا .. زى ستى ما كانت بتقول .. كانت بتقولى اوعى تمسك العود .. لو مسكت العود العود جواه عفريت .. حيطلع ديله اللى عامل زى التعبان ويلف حوالين رقبتى ويخنقنى .. او يكتفنى ويخطفنى جواه ستى قالتلى .. ان العفريت اكل عقل ابويا وخلاه خدامه .. عارفه كنت بعمل ايه ؟؟ .. كنت بجيب سكينة طويلة واربطها فى طرف عصاية مقشة .. وادخل سلاحها جوه العود .. واقعد انغز بيها العفريت .. انغز بيها العفريت .. لحد امى ما ماتت .. قولت يالله خليه يموتنى .. مسكت العود .. وغمضت عنيا واقعدت اعزف اعزف .. واستنيته علشان يخنقنى وبعد شوية سيبته وقعدت بعيد وقعدت اترعش .. من يومها صاحبته .. خليت العفريت يغنى .. كنت اسرق العود .. واروح على شط النيل فى آخر الدنيا .. واقعد اقلد ابويا .. اعزف واغنى .. بس كنت دايما بخاف من ابويا وستى !
