31/08/2026
ਫਾਜ਼ਿਲਕਾ ਜ਼ਿਲ੍ਹੇ ਵਿੱਚ ਐਨਾਲਾਗ/ਨਾਨ-ਡੇਅਰੀ ਪਨੀਰ ਦੀ ਵਿਕਰੀ ’ਤੇ ਪਾਬੰਦੀ – ਫੂਡ ਸੇਫਟੀ ਪ੍ਰਸ਼ਾਸਨ
ਫਾਜ਼ਿਲਕਾ, 31 ਅਗਸਤ 2026:
ਪੰਜਾਬ ਸਰਕਾਰ ਦੇ ਫੂਡ ਸੇਫਟੀ ਪ੍ਰਸ਼ਾਸਨ ਵੱਲੋਂ ਜਾਰੀ ਹੁਕਮਾਂ ਅਨੁਸਾਰ ਪੰਜਾਬ ਰਾਜ ਵਿੱਚ ਐਨਾਲਾਗ/ਨਾਨ-ਡੇਅਰੀ ਪਨੀਰ ਦੇ ਨਿਰਮਾਣ, ਪ੍ਰੋਸੈਸਿੰਗ, ਪੈਕਿੰਗ, ਸਟੋਰੇਜ, ਵੰਡ, ਆਵਾਜਾਈ, ਥੋਕ ਅਤੇ ਪ੍ਰਚੂਨ ਵਿਕਰੀ ਸਮੇਤ ਇਸ ਨੂੰ ਵਿਕਰੀ ਲਈ ਪੇਸ਼ ਕਰਨ ਜਾਂ ਪ੍ਰਦਰਸ਼ਿਤ ਕਰਨ ’ਤੇ ਪਾਬੰਦੀ ਲਗਾਈ ਗਈ ਹੈ।
ਡਾ ਕਵਿਤਾ ਸਿੰਘ ਸਿਵਲ ਸਰਜਨ ਫਾਜ਼ਿਲਕਾ ਜੀ ਦੀ ਦੇਖ ਰੇਖ ਵਿੱਚ
ਫੂਡ ਸੇਫਟੀ ਵਿਭਾਗ, ਫਾਜ਼ਿਲਕਾ ਵੱਲੋਂ ਜ਼ਿਲ੍ਹੇ ਦੇ ਸਾਰੇ ਮਠਿਆਈ ਵਿਕਰੇਤਾਵਾਂ, ਦੁੱਧ/ਪਨੀਰ ਵਿਕਰੇਤਾਵਾਂ, ਹੋਟਲਾਂ, ਰੈਸਟੋਰੈਂਟਾਂ, ਕੈਟਰਰਾਂ, ਢਾਬਿਆਂ, ਈਟਰੀਜ਼ ਅਤੇ ਕਲਾਊਡ ਕਿਚਨਾਂ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਉਹ ਐਨਾਲਾਗ ਜਾਂ ਨਾਨ-ਡੇਅਰੀ ਪਨੀਰ ਦੀ ਵਰਤੋਂ, ਸਟੋਰੇਜ ਜਾਂ ਵਿਕਰੀ ਨਾ ਕਰਨ।
ਹੁਕਮ ਅਨੁਸਾਰ ਐਨਾਲਾਗ/ਨਾਨ-ਡੇਅਰੀ ਪਨੀਰ ਤੋਂ ਭਾਵ ਅਜਿਹੇ ਉਤਪਾਦ ਤੋਂ ਹੈ ਜੋ ਪਨੀਰ ਵਰਗਾ ਦਿਖਾਈ ਦਿੰਦਾ ਹੋਵੇ ਪਰ ਜਿਸ ਵਿੱਚ ਦੁੱਧ ਦੀ ਚਰਬੀ ਜਾਂ ਮਿਲਕ ਸੋਲਿਡਜ਼ ਦੀ ਥਾਂ ਵੈਜੀਟੇਬਲ ਆਇਲ, ਵੈਜੀਟੇਬਲ ਫੈਟ ਜਾਂ ਹੋਰ ਗੈਰ-ਦੁੱਧੀ ਤੱਤ ਪੂਰੀ ਤਰ੍ਹਾਂ ਜਾਂ ਅੰਸ਼ਿਕ ਤੌਰ ’ਤੇ ਵਰਤੇ ਗਏ ਹੋਣ।
ਇਸ ਤੋਂ ਇਲਾਵਾ, ਕਿਸੇ ਵੀ ਹੋਟਲ, ਰੈਸਟੋਰੈਂਟ, ਕੈਟਰਰ ਜਾਂ ਹੋਰ ਫੂਡ ਸਰਵਿਸ ਅਦਾਰੇ ਵੱਲੋਂ ਅਜਿਹੇ ਪਨੀਰ ਦੀ ਵਰਤੋਂ ਕਰਕੇ ਭੋਜਨ ਤਿਆਰ ਕਰਨਾ ਜਾਂ ਗਾਹਕਾਂ ਨੂੰ ਅਸਲੀ ਪਨੀਰ ਦੇ ਨਾਮ ’ਤੇ ਪਰੋਸਣਾ ਵੀ ਮਨਾਹੀ ਹੈ।
ਫੂਡ ਸੇਫਟੀ ਵਿਭਾਗ ਫਾਜ਼ਿਲਕਾ ਵੱਲੋਂ ਜ਼ਿਲ੍ਹੇ ਵਿੱਚ ਪਨੀਰ ਦੀ ਵਿਕਰੀ ਅਤੇ ਵਰਤੋਂ ਸਬੰਧੀ ਨਿਯਮਤ ਚੈਕਿੰਗ ਕੀਤੀ ਜਾਵੇਗੀ। ਜੇਕਰ ਕਿਸੇ ਫੂਡ ਬਿਜ਼ਨਸ ਆਪਰੇਟਰ ਕੋਲ ਐਨਾਲਾਗ/ਨਾਨ-ਡੇਅਰੀ ਪਨੀਰ ਪਾਇਆ ਜਾਂਦਾ ਹੈ ਜਾਂ ਇਸ ਦੀ ਵਿਕਰੀ/ਵਰਤੋਂ ਕੀਤੀ ਜਾਂਦੀ ਹੈ ਤਾਂ Food Safety and Standards Act, 2006 ਅਤੇ ਲਾਗੂ ਨਿਯਮਾਂ ਅਧੀਨ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ ਅਤੇ ਉਲੰਘਣਾ ਕਰਨ ਵਾਲੀ ਵਸਤੂ ਨੂੰ ਕਾਨੂੰਨ ਅਨੁਸਾਰ ਜ਼ਬਤ ਅਤੇ ਨਸ਼ਟ ਕੀਤਾ ਜਾ ਸਕਦਾ ਹੈ। ਫੂਡ ਸੇਫਟੀ ਵਿਭਾਗ ਵੱਲੋਂ ਅਪ੍ਰੈਲ 2026 ਤੋਂ ਹੁਣ ਤੱਕ ਦੁੱਧ ਅਤੇ ਦੁੱਧ ਤੋਂ ਤਿਆਰ ਉਤਪਾਦ ਜਿਵੇਂ ਕਿ ਪਨੀਰ, ਘੀ, ਖੋਇਆ ਆਦਿ ਦੇ 51 ਨਮੂਨੇ ਬਾਜ਼ਾਰ ਵਿੱਚੋਂ ਭਰੇ ਗਏ ਜਿਸ 12 ਨਮੂਨੇ substandard ਪਾਏ ਗਏ ਅਤੇ 8 ਦੀ ਰਿਪੋਰਟ ਆਉਣੀ ਬਾਕੀ ਹੈ। Substandard ਉਤਪਾਦ ਵੇਚਣ ਵਾਲਿਆਂ ਉਪਰ ਫੂਡ ਸੇਫਟੀ ਸਟੈਂਡਰਡ ਐਕਟ 2006 ਤਹਿਤ ਕਾਰਵਾਈ ਚਲ ਰਹੀ ਹੈ।
ਵਿਭਾਗ ਵੱਲੋਂ ਆਮ ਲੋਕਾਂ ਨੂੰ ਵੀ ਅਪੀਲ ਕੀਤੀ ਗਈ ਹੈ ਕਿ ਪਨੀਰ ਖਰੀਦਦੇ ਸਮੇਂ ਇਸ ਦੀ ਗੁਣਵੱਤਾ ਅਤੇ ਲੇਬਲ ਦੀ ਜਾਂਚ ਕਰਨ ਅਤੇ ਜੇਕਰ ਕਿਸੇ ਦੁਕਾਨ/ਅਦਾਰੇ ਵਿੱਚ ਨਾਨ-ਡੇਅਰੀ ਜਾਂ ਐਨਾਲਾਗ ਪਨੀਰ ਨੂੰ ਅਸਲੀ ਪਨੀਰ ਵਜੋਂ ਵੇਚਿਆ ਜਾਂ ਵਰਤਿਆ ਜਾ ਰਿਹਾ ਹੋਵੇ ਤਾਂ ਇਸ ਦੀ ਸੂਚਨਾ ਫੂਡ ਸੇਫਟੀ ਵਿਭਾਗ ਨੂੰ ਦੇਣ।
