01/06/2023
ئۆیل پەمپ چیە؟ نیشانەکانی خراپ بوونی چیە؟ چۆن ئۆیل پەمپ بپارێزین لە خراپ بوون؟
ئۆیل پەمپ ئامێرێکی میکانیکیە کە پەستانی پێویست دروست دەکات بۆ کرداری سوڕاندنەوەی ڕۆن لەناو بزوێنەردا.
بڕی ئەو ڕۆنەی ئۆیل پەمپ دەینرێت بۆ بزوێنەر بەندە لەسەر خێرایی بزوێنەر چونکە ئۆیل پەمپ ڕاستەوخۆ لەسەر کرانک شەفتی بزوێنەر دەبەسترێت یاخود لەڕێگەی دیشلی و زنجیرەوە دەبەسترێتەوە بە کرانک شەفتی بزوێنەر. واتە چەند خێرایی (RPM) بزوێنەر زیاتربێت ئۆیل پەمپیش پەستانی زۆرتر دروست دەکات بۆ ناردنی ڕۆن.
دەرئەنجامی خراپ بوونی ئۆیل پەمپ؟
کاتێک ئۆیل پەمپ کار نەکات دەستبەجێ پاش ماوەیەکی کەم لە ڕۆیشتن بزوێنەر لە کارکردن دەوەستێت، بەمەش پێویست دەکات بزوێنەر بکرێتەوە و چارەسەر بکرێت، سەرەڕای تێچوویەکی زۆر تەمەنی بزوێنەریش کەم دەبێتەوە.
نیشانەکانی خراپ بوونی ئۆیل پەمپ چین؟
1. گڵۆپی ئۆیل پەمپ لەسەر داشبۆرد دادەگیرسێت.
2. گێچی پەستانی ڕۆن ئاستێکی نزم بخوێنێتەوە.
3. دەگونجێت بزوێنەرەکە دەنگێکی بەرز دەربکات.
چۆن ئۆیل پەمپ بپارێزین؟
هەروەکو فیول پەمپ، ئۆیل پەمپیش فلتەری هەیە کە لەناو کێسی ڕۆندایە، کەواتە بە پاک ڕاگرتنی فلتەر ئۆیل پەمپیش تەمەنی زیاتر \دەبێت ئەمەش دەکرێت بەهۆی :
1. ڕۆنێکی کوالێتی باش بەکاربێنین.
2. ڕونەکە بەڵخ دروست نەکات.
3. گرنگترینیان زوو گۆڕینی ڕۆنەکەیە پێش کاتی خۆی بۆنموونە ئەگەر ڕۆنەکە توانای (5000km)ـی هەبوو ئەوا لە (4000km) بیگۆڕە بۆ زیادبوونی تەمەنی ئۆیڵ پەمپ و بزوێنەریش.
4. گۆڕینی فلتەری ڕۆن لەگەڵ هەر ڕۆنگۆڕینێک.
جۆرەکانی ئۆیل پەمپ چین کە لە بزووێنەری ئوتومبێل بەکاردێن؟
ئۆیل پەمپ جۆری زۆرە بەڵام تەنیا دوو جۆریان لەناو بزوێنەری ئوتومبیلدا بەکاردێت ئەوانیش بریتیین لە :
جۆری یەکەم : The Gear Type Oil Pump
جۆری دووەم : The Rotor Oil Pump
نووسینی/ ئەندازیاری میکانیک_ کاروان نصراللە
وەرگیراوە لە پەیجی زانیاری میکانیکی بەسووپاسەوە
