22/05/2026
Намайг Энхтөр овогтой Сэргэлэнбаатар гэдэг. Би "Шинжлэх Ухаан Технологийн Их Сургууль" - ийн Компьютер Техник, Менежментийн Сургуулийг 2014 онд Програм хангамжийн инженер мэргэжлээр төгссөн. Одоо мэргэжлээрээ тасралтгүй 12 дахь жилдээ ажиллаж байна.
Оюутан байх үеэсээ л “Зүгээр нэг программист биш, бодит асуудал шийддэг инженер болно” гэж боддог байлаа. Хичээл дээр сурсан онолоо бодит бизнес дээр хэрэгжүүлж, хүмүүсийн ажлыг хөнгөвчилдөг систем бүтээх хүсэл надад үргэлж байсан.
Сургуулиа төгсөөд анхны ажил дээрээ одоогийн удирдлагуудтайгаа танилцаж, ажлын гараагаа эхлүүлж байлаа. Залуу, эрч хүчтэй, шинэ зүйл бүтээх хүсэлтэй хүмүүсийн дунд ажиллаж эхэлсэн нь надад маш том урам өгсөн.
Миний хувьд "Smart Logic" Монголын программ хангамжийн компанийг карьерынхаа зам болгож сонгосон хэд хэдэн шалтгаан байсан. Нэгдүгээрт, туршлагатай хүмүүсээс суралцахыг хүссэн. Хоёрдугаарт, тухайн үед компани маань үүсгэн байгуулагдаад удаагүй, хөгжлийнхөө эхэн үед явж байсан учраас “Би өөрийн мэдлэг, ур чадвараараа энэ компанийн өсөлтөд бодит хувь нэмэр оруулж чадна” гэж бодсон.
Анх ажилд орж байсан үеэ эргэн санахад бүх зүйл одоогийнх шиг системтэй, том бүтэцтэй байгаагүй. Заримдаа өдөржин програм суулгах, шинэчлэх ажил хийж, оройн цагаар сууж код бичин систем хөгжүүлэлт дээр ажиллана. Өглөө нь хэрэглэгч дээр очиж сургалт орно. Гэхдээ тэр цаг хугацаа надад хамгийн их туршлага, хамгийн их өсөлтийг өгсөн.
Энэ хугацаанд би зөвхөн програм бичиж сураагүй. Харин:
👉Багаар ажиллах
👉Хэрэглэгчийн асуудлыг ойлгох
👉Бизнес процессыг системчлэх
👉Том системийн архитектур төлөвлөх
👉Хариуцлага үүрэх
👉Шийдвэр гаргах
👉Манлайлах ур чадваруудыг бодитоор сурсан.
Өнөөдөр эргээд харахад 9 жилийн хугацаанд Смарттай хамтдаа өсөж, ERP, Sales & Distribution, CRM, WMS, Cloud, Mobile зэрэг олон төрлийн систем дээр ажиллаж, байгууллагуудын өдөр тутмын ажлыг хөнгөвчилсөн шийдлүүд хөгжүүлсэндээ бахархдаг. Миний хувьд энэ 9 жил бол зүгээр нэг ажлын туршлага биш. Энэ хугацаа бол:
👉Өөрийгөө хөгжүүлсэн
👉Алдаа гаргаж суралцсан
👉Олон чадварлаг хүмүүстэй хамтарч ажилласан
👉Технологийн хувьд тасралтгүй өссөн
👉Карьер болон амьдралын үнэт замналаа бүтээсэн он жилүүд байлаа.
Одоо ч гэсэн би “Илүү ухаалаг, илүү үнэ цэнтэй системүүдийг Монголдоо бүтээе” гэсэн хүсэлтэйгээр өдөр бүр суралцаж, хөгжиж, багтайгаа хамт урагшилсаар байна.
Миний амьдралын уриа
Идэвхтэй бай. Зүтгэлтэй бай 😉
