TMM

11/01/2026

11/01/2026

8e sware aktivite kwazad misyon Bethesda la gonave,ansagalè

10/31/2026

🎉❤️ 9YÈM ANIVÈSÈ RASIN DEVLOPMAN | NÈF ANE ANGАJMAN, SOLIDARITE AK DEVLOPMAN!

Se nan yon anbyans chalere, fratènèl ak konvivyal Rasin Devlopman te selebre 9yèm anivèsè egzistans li. Yon bèl okazyon ki te reyini plizyè pèsonalite, reprezantan enstitisyon, lidè kominotè, patnè, zanmi ak lòt envite ki te vin pataje moman espesyal sa a.

Pandan n ap make nèf ane depi Rasin Devlopman ap travay pou devlopman zile La Gonâve, se yon okazyon pou nou gade chemen ki deja trase, rekonèt efò tout moun ki kontribye nan avansman òganizasyon an epi mete an valè enpòtans angajman kominotè nan konstriksyon yon pi bon avni pou popilasyon an.

Depi nan kòmansman, Rasin Devlopman chwazi mete kominote yo nan sant aksyon li. Atravè yon vizyon ki chita sou patisipasyon, solidarite ak ranfòsman kapasite lokal yo, òganizasyon an kontinye ankouraje lidèchip kominotè, dyalòg ant sitwayen ak otorite lokal yo, epi akonpaye inisyativ ki vize amelyore kondisyon lavi moun nan diferan lokalite zile a.

Atravè pwogram tankou Twa Wòch Dife, Volontè pou Chanjman, Fanm k ap Kondwi, Fanm Djanm, Dyalòg Kominotè ak Kore Solidarite, Rasin Devlopman kontribye nan fòmasyon lidè lokal, patisipasyon fanm nan devlopman, mobilizasyon sitwayen ak realizasyon pwojè kominotè.

Selebrasyon 9yèm anivèsè sa a te yon bèl moman rekonesans, rankont ak pataj. Prezans divès pèsonalite ak envite ki te reponn prezan montre enpòtans relasyon, kolaborasyon ak patenarya nan travay devlopman kominotè.

Yon rekonesans espesyal pou fondatè yo, ekip administratif la, anplwaye yo, volontè yo, patnè yo, lidè kominotè yo ak tout moun ki mete men nan travay sa a pandan nèf dènye ane yo.

Nèf ane se yon etap enpòtan, men gen anpil lòt defi pou leve ak anpil lòt objektif pou atenn. Se pou lespri solidarite, angajman ak devlopman ki anime Rasin Devlopman kontinye grandi epi kontinye pote chanjman pozitif nan lavi kominote gonavyèn yo.

🎂 Bòn fèt 9yèm anivèsè Rasin Devlopman!

RASIN DEVLOPMAN, ANSANM POU YON LA GONÂVE KI PI FÒ, PI SOLIDÈ AK PI DEVLOPE!

✍️📸Castor Vladimir SIMON | PDG TMM

10/30/2026

🇭🇹 ANN DEKOUVRI ELSHADARA JEAN-LOUIS

Yon pitit Zilebwa, yon pakou nan domèn konesans ak fòmasyon.

Nan lokalite Zilebwa, nan dezyèm seksyon kominal Petite Source, se la Elshadara JEAN-LOUIS fèt.

Se yon pitit tè Ansagalè ki gen yon pakou ki chita sou fòmasyon, edikasyon ak konesans.

Li se nòmalyèn ak anseyan.

Nan yon sosyete kote edikasyon gen yon wòl fondamantal, metye ansèyman an mande pasyans, devouman ak anpil respè pou moun. Se yon domèn kote transmisyon konesans kapab make lavi yon jenerasyon.

Dèyè chak etap nan yon pakou genyen efò, aprantisaj ak eksperyans ki kontribye nan fòme yon moun.

Jodi a, Elshadara JEAN-LOUIS prezante nan ekip minisipal la kòm Majistra Adjwen.

Soti Zilebwa rive nan nivo angajman minisipal, istwa li fè nou sonje enpòtans pou tout seksyon nan komin nan jwenn plas yo nan refleksyon sou avni Ansagalè.

Paske lè nou bay edikasyon, konesans ak moun valè, nou kontribye nan prepare yon demen ki pi rich pou jenerasyon k ap vini yo.

❤️ Zilebwa se yon pati nan gwo istwa Ansagalè!

10/30/2026

🇭🇹 ANN DEKOUVRI SNAÏDER JEAN-BAPTISTE

Yon pakou ki chita sou konesans, fòmasyon ak eksperyans.

Nan lokalite Chérisable, nan komin Ansagalè, se la istwa Snaïder JEAN-BAPTISTE pran rasin.

Pakou li make ak plizyè etap fòmasyon ak eksperyans nan diferan domèn. Li se enjenyè sivil, pwofesè, enfòmatisyen ak elektrisyen.

Li genyen eksperyans nan ansèyman matematik ak enfòmatik, ansanm ak administrasyon lekòl.

Fòmasyon li touche plizyè lòt domèn tankou jeni sivil, elektrisite, jewoloji, lidèchip ak jesyon pwojè.

Dèyè divèsite sa a, nou jwenn yon pakou ki montre enpòtans aprantisaj, fòmasyon ak akimilasyon konesans.

Chak domèn pote pwòp eksperyans pa li. Chak konesans kapab louvri pòt sou yon lòt fason pou konprann defi yon komin ap rankontre.

Jodi a, Snaïder JEAN-BAPTISTE prezante nan ekip minisipal la kòm Majistra Adjwen.

Orijin li nan Chérisable raple nou tou valè chak lokalite genyen nan konstriksyon avni Ansagalè.

Paske devlopman pa fèt san konesans, san fòmasyon, san lide ak san moun ki pare pou pataje eksperyans yo.

❤️ Chérisable gen yon plas nan istwa Ansagalè!

10/30/2026

🇭🇹 ANN DEKOUVRI CASTOR VLADIMIR SIMON

Yon pitit Ansagalè, yon vizyon pou demen.

Chak moun gen yon istwa. Chak angajman gen yon rezon. E dèyè chak rèv pou wè yon komin avanse, gen yon lanmou espesyal pou tè kote nou soti a.

Castor Vladimir SIMON se yon non ki asosye ak yon vizyon pou lavni komin Ansagalè. Angajman li mete aksan sou nesesite pou komin nan pran yon lòt direksyon, kote devlopman, respè, transparans ak patisipasyon sitwayen yo gen tout enpòtans yo.

Nan prezantasyon ekip minisipal la, li pote responsablite Majistra Prensipal.

Vizyon li mete devan plizyè gwo domèn ki enpòtan pou avni komin nan: edikasyon, lasante, enèji, agrikilti, sekirite piblik ak enfrastrikti.

Paske yon komin pa mezire sèlman ak sa li genyen jodi a, men tou ak sa li kapab vin ye demen.

Ansagalè gen yon istwa, yon idantite ak yon potansyèl ki merite atansyon. Se sou baz sa a refleksyon sou avni komin nan dwe kontinye.

Ansagalè se lakay nou. Avni li se yon responsabilite nou tout pataje.

❤️ Ansanm nou ka chanje figi Ansagalè!

10/30/2026

❤️🇭🇹 ANSAGALÈ SE LAKAY NOU, SE RASIN NOU, SE AVNI NOU!

Chak fwa nou gade Ansagalè, nou sonje bèl potansyèl komin nou an, bèl moun li genyen, jèn li yo ki chaje ak rèv, fanmi k ap goumen chak jou pou yon demen miyò, ak tout pitit tè sa a ki swete wè komin yo a pran yon lòt direksyon.

Nou konnen chemen an pa fasil. Nou konnen gen anpil bagay ki bezwen chanje, anpil defi ki devan nou. Men nou kwè Ansagalè gen tout sa li bezwen pou l avanse. Sa li bezwen, se plis angajman, plis tèt ansanm, plis respè ak yon vizyon ki mete enterè popilasyon an an premye.

Se nan lespri sa a nou prezante ekip nou an:

🔹 Castor Vladimir Simon — Maire Principal
🔹 Snaïder JEAN-BAPTISTE — Maire Adjoint
🔹 Elshadara JEAN-LOUIS — Maire Adjoint

Nou pa prezante tèt nou kòm moun ki gen tout repons yo, men kòm moun ki kwè nan fòs travay, nan dyalòg, nan sèvis ak nan kapasite nou genyen pou konstwi yon pi bon avni ansanm.

Nou vle yon Ansagalè kote timoun yo jwenn bon edikasyon, kote moun malad jwenn swen, kote jèn yo jwenn opòtinite, kote sekirite ak enfrastrikti se yon priyorite, epi kote agrikilti ak enèji kontribye nan devlopman komin nan.

Nou pa ka chanje tout bagay nan yon sèl jou, men nou kapab kòmanse chanjman an ansanm, ak volonte, kouraj ak detèminasyon.

Paske Ansagalè pa pou yon sèl moun, li pa pou yon sèl fanmi, li pa pou yon sèl jenerasyon. !

Se pou lanmou nou gen pou komin nou an pi fò pase diferans nou yo. Se pou nou mete men ansanm pou jenerasyon k ap vini yo ka jwenn yon Ansagalè ki pi bèl, pi solid ak pi pwospè.

❤️ ANSANM NOU KA CHANJE FIGI ANSAGALÈ!

Pou Ansagalè, ak tout kè nou.

10/28/2026

4ème sware kwazad anyel misyon legliz bethesda la gonave, la ansagalè

10/17/2026

Sion Morgue Cérémonie Funéraire BLANC Mesguerre (Don Mezgueto) né le 15 Octobre 1975 & Décédé le 30 Septembre 2026 à l'âge de 51 ans.

Église Catholique Saint Isidore Samedi 17 Octobre 2026 à 3h PM.

10/17/2026

Seremoni Fineray Blanc Mesguerre (Don Mesgueto)