16/07/2026
Si agjensi kreative, Kameleoni e ka kthyer në një traditë dhe përgjegjësi artistike që çdo vit t'i japë një frymë dhe identitet të ri vizual Festivalit Ballkanik të Folklorit të Valleve "OPOJA Vallëzon". Ky rrugëtim kreativ është, mbi të gjitha, një formë e jona për të falënderuar dhe nderuar nga zemra të gjithë organizatorët, kontribuesit dhe mbështetësit që ndër vite kanë mbajtur gjallë këtë ngjarje madhështore kulturore.
Nëse në edicionet e kaluara jemi frymëzuar thellësisht nga detajet dhe motivet e veshjeve tradicionale autoktone të burrave dhe grave të Opojës, këtë vit kemi vendosur të kthejmë sytë nga natyra, nga vetë thelbi dhe "shtëpia" ku kjo mrekulli ndodh.
Subjekti kryesor i këtij edicioni është: Kokrra e Pishës.
Zgjedhja e këtij simboli nuk është e rastësishme. Fshati Bresanë, i cili është zemra e këtij festivali dhe shtëpia e Ansamblit "Bresana", pushon i qetë rrëzë maleve të mbuluara me pisha. Vetë festivali, atmosfera e tij, dhe publiku që mblidhet, frymojnë dhe festojnë nën hijen freskuese të këtyre drunjve. Pisha përfaqëson rrënjët, qëndrueshmërinë dhe mikpritjen e natyrës sonë.
Në dizajnin e këtij viti, kokrra e pishës nuk është thjesht një element natyror, por është ndërtuar si një mozaik i harmonisë. Çdo luspë e kësaj kokrre pishe përfaqëson një kulturë, një flamur dhe një traditë të shteteve të ndryshme që marrin pjesë në këtë edicion. Të gjitha këto ngjyra dhe kombe bashkohen rreth një qendre të përbashkët, duke formuar një trup të vetëm, ashtu siç muzika dhe vallja bashkojnë popujt në paqe dhe harmoni në skenën e "OPOJA Vallëzon".
Për të ruajtur vulën e identitetit tonë si mikpritës dhe krenarinë e Opojës, në të dy anët e kësaj pishe, shfaqen dy valltarë, një djalë dhe një vajzë, të veshur me kostumet tona të mrekullueshme tradicionale. Me lëvizjet e tyre plot jetë e hijeshi, ata i ftojnë të gjitha kulturat e tjera t'i bashkohen valles sonë.
Nga Kameleoni, ky dizajn është një homazh për Bresanën, për natyrën tonë, për diversitetin kulturor, dhe për të gjithë ata që e bëjnë këtë festival të mundur vit pas viti.
Mirë se vini nën hijen e pishave. Mirë se vini në Opojë!
