06/01/2025
𝗔𝗞𝗛𝗘𝗡𝗧𝗘 𝗘 𝗤𝗢𝗦𝗔 𝗠𝗢𝗧𝗟𝗢𝗧𝗟𝗘𝗛𝗜
Hoatiti News 5.1.2025
Akhente ea Lesotho, Adv. Fusi Sehapi (ea fotong ofising ea hae) o hlahletse nyeoe moo a tsekang h**e liakhente li se eme lilemo tse 15 pele li ka fuoa maemo a Tlotlo e Kholo e fuoang liakhente tse kholo e bitsoang 𝗞𝗶𝗻𝗴'𝘀 𝗖𝗼𝘂𝗻𝘀𝗲𝗹 (𝗞𝗖).
Akhente ea maemo a KC e nkoa e le kholo ebile e ea hlompheha le makhotleng joaloka Adv. Motiea Teele (KC), Zwelakhe Mda (KC) le ba bang.
Nyeoeng ena baqosuoa ke ba latelang ka tatellano: Mokhatlo oa Liakhente oa Lesotho (Law Society), Akhente e Kholo ea 'Muso (Attorney General), Moahloli e Moholo le Motlotlehi.
Ho sa le joalo, Molao oa Liakhente oa Lesotho (Legal Practitioners Act, 1983) temana ea 7 (1) o re Motlotlehi ka khothaletso ea Moahloli e Moholo a ka fana ka Tlotlo ea KC ho liakhente tse sebelitseng ka thata le ho ipabola kabong ea toka makhotleng a Lesotho.
Molao o supa h**e ntle le makhabane le boipabolo ba liakhente, Tlotlo e ka fanoa ho liakhente tse sebelitseng makhotleng bonyane lilemo tse 15 ho ea holimo.
Lithapelitseng tsa hae lipampiring tsa Lekhotla, Sehapi o batla lekhotla le lahlele matjoing temana e supang h**e liakhente li eme lilemo tse 15 pele li ka fuoa maemo a KC. O re temana ena e khahlanong le molao oa motheo kaha ha e na moo e nang le maemo a khethehileng (exception).
Sehapi o batla h**e Motlotlehi a mo fe tlotlo ena leha a e-s’o qete lilemo tse 15 e le akhente; hajoale o na le lilemo tse leshome feela. O amohetsoe e le akhente naheng ea Lesotho le Afrika Boroa 'me o re ts'ela ea ts'ebetso e tlameha ho ts'oana linaheng tseo hoba Afrika Boroa e fana ka Tlotlo e ts'oanang maemong a ikhethang (exception) ho sa emeloe h**e akhente e qete lilemo tse leshome.
O lla ka h**e eena ke akhente e ipabotseng haholo e lokelang ho nkoa e le akhente e kholo empa kaha ha a e-s’o fuoe maemo a KC, oa nyenyefatsoa.
O boetse o pheha khang h**e molao ona o hlabana le Molao oa Motheo o supang h**e motho e mong le e mong o na le tokelo ea ho ba le seriti (right to dignity).
“I have a right to dignity and the fact that I have not been conferred with the honour of KC, I am treated like a junior lawyer while I am not. This simply demeans my dignity which is by law protected by the Costitution."
“Nako ea lilemo tse 15 h**e akhente e emele ho fuoa Tlotlo ena e telele haholo. Linaheng tse ling tsa Commonwealth joaloka Afrika Boroa, liakhente li ema lilemo tse 10 feela; 15 years e telele haholo kannete." Sehapi o hlalosa joalo a bua le Hoatiti News.
O boetse o batla h**e Mokhatlo oa Liakhente oa Lesotho e-be oona o amohelang likhothalletso tsa liakhente tse lokelang ho fuoa maemo a KC, e seng e-be Moahloli e Moholo.
Lekaota lena le batla h**e ha liakhente li entse likopo tsa ho fuoa maemo ana, Law Society Council e-be eona e ts’oarang lipuisano (interviews) ho ea ka temana ea 7 ea Legal Practitioners Act, 1983 e baloa hammoho le Molaoana oa 42 oa Law Society Rules, 2012.
Ho feta mona, Sehapi o batla h**e nyeoe e huloe lekhotleng litaba tsena li sebetsoe ka thoko ho lekhotla. Lengolong leo a le ngoletseng moqosuoa oa pele - Mokhatlo oa Liakhente - o supa lintlha tse 'maloa tseo a reng o lokela ho shejoa ka leihlo le leng a fuoe maemo ao ka tsela e ikhethang ho eena.
O re kaha o sa le mocha lilemong ho ka ba bohlokoa h**e a fuoe maemo ana honajoale a tsebe ho ikonka ka oona a sa le phaka li metsi tjena. O re seo se tla khothatsa bo-mphato'ae ba liakhente tse nyane h**e le bona ba sebetse ka thata joaloka eena.
“Ke sebelitse ka matla haholo ntlafatsong ea molao le kabong ea toka kahara naha ena. Ke sirelelitse Molao oa Motheo le linakong tse thata hape ke loanne ka boitebalo linyeoeng tse sireletsang Molao oa Motheo, litokelo tsa sechaba le linyeoeng tsa litsekisano tsa sepolotiki le moruo.
"Ke beha kapele ho Law Society h**e karolo ea ka ke e bapetse h**e ke fuoe Tlotlo ena 'me ke kopa taba ena e sebetsoe ka potlako ka thoko ho lekhotla.
"Har'a linyeoe tse kholo tseo ke ke bileng 'muelli ho tsona, nka qolla moo ke neng ke le 'muelli nyeoeng ea Kananelo Boloetse le Motlotlotlehi le ba bang moo Lekhotla la Maipiletso le ileng la laela Motlotlehi h**e a se fetisi molao o ileng oa etsoa ke paramente kamora h**e e qhaloe.
"Batho ba ne ba bua ba re Motlotlehi a ke ke a qosoa empa ke entse joalo ka hlola lekhotleng le leholo." Sehapi o rialo lengolong leo a le ngolletseng Mokhatlo oa Liakhente oa Lesotho.